РД-йин республикайин жигьиларин центрин гъуллугъчи Аьлимурад Аьлибеговдин «Саб халкь» проект уьмриз кечирмиш апIбан дахилнаъди, рес-публикайин табасаран чIалниинди чапдиан удубчIвурайи «Табасарандин нурар» газатдин, Табасаран ва Хив районарин администрацйирин кюмекниинди 13-пи ноябриъ Мягьячгъалайин «Урусат – йиз тарих» тарихи паркдиъ табасаран халкьдин этнографияйин сабпи диктант кIули гъубшнийи. Этнографияйин диктант гъабхбан метлеб – табасаранарин халкьдин милли культурайихьна маркьлувал за апIувал вуйи.
Къайд апIувал лазим вуки, серенжем гъабхурайи залин айвандикк, табасаран милли хурагарихьди албагну, дуланажагъдиъ ишлетмиш апIру алатарин майдан гьатIабццнайи.
Диктантдиъ вахтназ вуди РД-йин Правительствойин председателин сарпи заместителин вазифйир тамам апIурайи Нюсрет Уьмаров, вахтназ вуди РД-йин юстицияйин министрин вазифйир тамам апIурайи Къазимягьямед Сефикъурбанов, Халкьдин Собраниейин депутатар – Алавудин Мирзабалаев, Расим Гьяжиагъаев, Табасаран ва Хив районарин главйир – Мягьямед Къурбанов ва Ярмет Ярметов, илимдин интеллигенция, культурайин, жигьиларин тешкилатарин вакилар, студентар иштирак гъахьнийи.
Серенжем ачмиш апIури, этнографияйин диктантдиз уч духьнайидарин улихь «Табасарандин нурар» газатдин кIулин редактор Гюлягьмад Маллялиев удучIвну гъулхнийи. «Учву гьаму диктантдиз уч хьували учву табасаранарин аьдатар уьрхюрайивал субут апIура. Халкьдин важиблу месэлйир гьял апIруган, табасаранар гьарган гьамци уч шули гъахьну. Ихь улихь гъира читин месэлйир дийигъна – думу багъри культура уьбхюрайидарин, багъри чIал апIурайидарин кьадар цIиб шулайивал, халкьдин тарих бегьемди ахтармиш дапIну адрувал ву. Гьаддиз ухьу варидари миллетдин уьмриъ иштирак’вал дапIну ккунду», – къайд гъапIнийи Гюлягьмад Маллялиевди.
Дупну ккундуки, этнографияйин диктантдиъ табасаран миллетдин фольклорин, жюрбежюр аьдатарин, тарихнан, культурайин, чIалнан ва литературайин цирклариан 50 суал айи.
Гьадму йигъан этнографияйин диктантдин кьяляхъ студент жигьиларин арайиъ шашкйир уйнамиш апIбаан талитар кIули гъушнийи. Хябяхъган рес-публикайин вузариъ урхурайи жигьилар табасаран чIалниинди вуйи брейн-рингдиъ иштирак гъахьнийи.
Табасаранарин этнографияйин аьхю диктантдин гьякьнаан газатдин гъюру нумрайиъ яркьуди мялуматар тувдича.
