Цци хьадну Ярославль шагьрин Олимпиадайин резервдин 20-пи нумрайин мектебдин вакил Расул Гьяжиевди боксдиан Европайин талитариъ гъизилин медаль гъадабгъну. 15-16 йисаъ айи жигьиларин арайиъ вуйи му талитар июлин вазлиъ Тбилиси шагьриъ кIули гъушнийи.
Медалар бадали 13 жюрейин гъагънан категорйириъ 30 уьлкейиан дуфнайи 220 спортсменди спортдин кчIихбар кIули гъухнийи. «Шубуб ваз улихьна Расул Гьяжиевди ва Вячеслав Рогозинди, боксдиан Урусат-диъ сабпи йишв бадали Анапайиъ кIули гъушу талитарин вари кчIихбариъ гъалибвалар гъадагъну, вари халкьарин талитариъ иштирак хьуз путевкйир гъазанмиш гъапIнийи. Хъа Европайин талитариъ баяри Ярославль шагьрин боксдин мектебдиъ ужудар спортсменар гьязур апIурайивал тасдикь гъапIну», – гъапну Ярославль областдин кIулиъ айи Дмитрий Мироновди.
Расул Гьяжиев Табасаран райондин вакиларикан вуйиб мялум гъабхьиган, узу дугъан эме гъагунза ва дугъахъди сюгьбат гъубхунза. Дугъу къайд гъапIганси, Расул Гьяжиевди Ярославль шагьрин 88-пи нумрайин мектебдиъ урхура. Думу чан яш хьуд йис гъабхьихъан тина спортдиин машгъул духьна. Гизаф йисари Ярославль шагьриъ яшамиш шулайи дугъан адаш Сяид Гьяжиев Табасаран райондин Зил гъулан вакил ву.
Сяид Гьяжиевди, Ярославлдин гьюкуматдин техникайин университетдин тикилишчивалин цирклиъ экономикайин ва идара апIувалин факультет ккудубкIну, 2000-пи йисан чан гъардшихъди рукь масу тувру компания тешкил гъапIну. Думу ужуб хизандин эйсира ву, дугъу кьюр бай ва сар риш тербияламиш апIура. Кьюрид баярра боксдиин машгъул духьна. Баяри, спортдиъ хъуркьувалар улупурайиганси, мектебдиъ дарсарра 4-5 кьиматариз урхура. Хизандиъ веледариз туврайи тербия заан дережайиъ дебккна.
2020-пи йисан, РД-йин милли политикайин ва диндин ляхнариз лигру министр Энрик Муслимовди Расул Гьяжиевдиз республикайин гъирагъдиъ яшамиш шулайи Дагъустандин вакилизси, спортдин талитариъ иштирак хьувализ лигну, Гьюрматнан грамота тувну.
Хъа Расулин аба Гьяжи-бала Гьяжиев гизаф йисари гъулан мектебдиъ гъилиху лайикьлу мялим, шаир, Табасаран райондиъ гизафдариз мялум вуйи кас ву.
Расул Гьяжиев 2018-пи, 2020-пи йисари боксдиан Урусатдин чемпион, хъа 2021-пи йисан 80 килограмм гъагъ айи боксерарин арайиъ Европайин чемпион гъахьну. Жигьил боксер Ярославль областдин губернаторин премйирин сагьибра ву. Расул Гьяжиевди спортдиъ гъадагънайи чан хъуркьувалариинди Ярославль область машгьур гъапIну. Областдин тарихнаъ бокс апIбан цирклиъ, мектебдиъ урхури имиди, думу жюрейин хъуркьувалар сарихьанра гъадагъуз дубхьнадайи. Думу боксдиан варихалкьарин классдин спортдин мастер гъахьну.
Расул Гьяжиевди гъадагънайи хъуркьуваларик дугъан тренер Владимир Колесниковдин лайикьлу пай ка.
Расул Сяидович, увуз хъана заан хъуркьувалар ккун апIурача, Олимпиадайин чемпион духьну, ухьу варидари думу тебрик апIруганси ибшри!
