Республикайин наркодиспансериан туврайи улупбариинди, Дагъустандиъ наркотикар ишлетмиш апIурайидарин кьадар йислан-йисаз артухъ шула. Гъалабулугъвал кипрайиб гьадму вуки, гьисабназ гъадагъурайидарин арайиъ асас йишв жигьил дишагьлийири бисура. Республикайиъ, наркотикар ишлетмиш апIбаз, тарагъбаз аькси вуди, вазлин арайиъ швнуб-саб серенжем гъахури шулу. Байвахтнаанмина наркотикарин зегьерлуваликан варидариз хабар а. Амма аьгьвалат дигиш шуладар.
РФ-дин Дагъустандиъ айи МВД-йин наркотикариин гюзчивал гъабхру управлениейин гъуллугъчи Надежда Сейфудиновайи къайд апIу-райиганси, республикайиъ саки гьяр гьяфтайиъ наркотикариин гюзчивал гъабхру управлениейиз наркотикар масу тувради гъидису вая наркотикдин сурсат ишлетмиш дапIнайи жигьил шубар хури шулу. Гъюблан-гъюбаз дурари гъагъи наркотикар ишлетмиш апIуз хъюгъра.
Республикайин наркологияйин диспансерин гьисабназ 6118 наркоман ва наркотикарин сурсатар ишлетмиш апIурайидар гъадагъна. Дурарин асас пай чпин яш 30 йис дубхьну адру жигьилар ву. Нарколог духтрарин ва Надежда Сейфудиновайин гафариинди, республика-йиъ наркотикар ишлетмиш апIурайидарин гьякьикьи кьадар аьгъю апIбан бадали, наркотикар ишлетмиш апIури гьисабнаъ айидарикан вуйи улупбар 10 ражари зарб дапIну ккунду.
Надежда Сейфудинова гьар гьяфтайиъ республикайин вузарин, кьялан пишекарвалин идарйирин студентарихъди, мектебарин ученикарихъди гюрюшмиш шула. Дугъу чан лекцйириъ жигьилариз ва живанариз наркоманарин ва наркотикар ишлетмиш апIурайидарин фаркь’валикан, наркотикари инсандин бедендиз хурайи зарарнакан, наркотикар ишлетмиш апIувалихъди аьлакьалу вуди бедендиъ арайиз гъюрайи уьзрарикан ва дурарин хатIалуваликан, му ляхнихъ хъайидариз къанундиъ улупнайи жазайикан кIури шулу. Наркоман – наркотикарин асиллувалиъ ахънайи аьзарлу кас ву. Хъа наркотикар ишлетмиш апIрур – гьеле дурарин асиллувалиъ ахъну адру, амма фурс вуди вая чIуру гъиллигъси наркотикар ишлетмиш апIурайириз кIуру.
Сабсана гъагъи месэла арайиз дуфна. Аьхиримжи йисари социальный сетариан ва мессенджерариан наркотикар масу тувуз жалб апIурайи касар удучIвна. Хасавюрт, Мягьячгъала, Каспийск шагьрариъ, социальный сетариан жигьилар жалб дапIну, наркотикар масу тувуз хъюгънайи, яшар бегьем духьну адру швнур-сар живан гъидисну. Гъидису живанарин арайиъ сарин яш 16 йис дубхьнайи, дугъаз 6 йисан дустагъ апIбан жаза гьадабтIну.
Надежда Сейфудиновнайи къайд гъапIганси, республикайин кIулиъ айи Сергей Меликовди наркотикар тарагъбаз аькси вуди гъабхурайи ляхниз аьхю фикир тувра. Мягьячгъала шагьрин собраниейин депутатар къанун уьбх- ру органарин вакиларихъди сатIиди вузарин, сузарин студентарихъди, мектебарин ученикарихъди ва мялимарихъди кми-кмиди гюрюшмиш шула. Багахь йигъари республикайин вари мектебариъ наркотикариз аькси серенжемар гъахиди.
