Уьмрин кьисмат дубхьну, ватандихьан ярхлаъ ашра, гъуландар кIваълан гьадрархру, багъри гъулхъан юкIв убгру касар ихь халкьдин арайиъ гизаф а. Гьадрарикан сар Табасаран райондин Заан Гюгьрягъ гъулан агьалин Амир Мирзахановра (шиклиъ) ву.
Мирзаханов Амирбег Аьбдуллаевич 1965-пи йисан 6-пи июлиъ Дагъустан Республикайин Табасаран райондин Гюгьрягъ гъулаъ бабкан гъахьну. Дугъу 1981-пи йисан Дагъниарин 8 йисандин мектеб, хъа 1983-пи йисан Жулжгъарин кьялан мектеб ккудукIну. 1990-пи йисан думу Воронеждиъ айи Аграрный университетдин агрономвалин факультетдик урхуз кучIвру ва думура хъуркьувалиинди ккудубкIуру.
2001-пи йисан Амирбег Мирзахановди Воронежский областдин Подгоренский райондиъ айи, Калининдин ччвурнахъ хъайи колхоздин аьхюну агрономди ляхин апIуз хъюгъну.
2004-пи йисан Амирбег Мирзаханов Воронежский областдин Павловск шагьриъ айи «Апротек» кIуру агрофирмайин директорди дийигъуру. 2005-пи йисан думу Калининдин ччвурнахъ хъайи колхоздин председателди тяйин апIуру. 2006-пи йисан дугъу ООО «Дружба» кIуру хусуси кархана абццру.
Тахил гьясил апIбаан заан бегьер гъадабгъувализ лигну, 2008-пи ва 2011-пи йисари ООО «Дружба» Воронежский областдиъ гъулан мяишатдин варитIан ужуб карханаси гьисаб гъапIну ва кьюб гъизилин медализ лайикьлу гъабхьну, гьацира думу дипломар, грамотйир ва жюрбежюр жара пешкешар тувбиинди лишанлу гъапIну.
Швнуд-сад йисариинди намуслуди ва баркаллувалиинди зегьмет зигбаз лигну, 2016-пи йисан Амирбег Мирзахановдиз «Урусатдин Федерацияйин гъулан мяишатдин лайикьлу гъуллугъчи» кIуру ччвур тувру, 2017-пи йисан думу «Зегьметнан ветеран» кIуру гьюрматлу ччвурнанра сагьиб шулу.
Амирбег Мирзахановди 2018-пи йисан чан балин ликрихъ КФХ-ра ачмиш апIуру.
Мирзахановарин хизан кьюб терефнахъанди либхура: абайи гъулан мяишатдин итIру сурсатар гьясил апIура, хъа бали – никк тувру мал-къара.
Гьамусяаьт Амирбег Мирзаханов, Воронежский областдин Подгоренский райондин Петропавловка кIуру хуториъ, Скорорыб кIуру гъулаъ яшамиш шула. Думу касди, гьаму улихьна йигъари чан багъри Гюгьрягъ гъулаз дуфну, 1 200 000 манатдин меценатвалин вазифйир тамам дапIну, Дагъниарин гъулан мектебдихъан Гюгьрягъна ва саб кючейиин асфальт улубзуз гъитну. Дугъу учв гьамусяаьт яшамиш шулайи гъулазра хайлин кюмекар апIура: накьварилан бару илбицну, гъулан кючйириин асфальт улубзуз, гъулан мектебдиз лазим вуйи авадлугъар масу гъадагъуз, гъулаъ жюрбежюр серенжемар тешкил апIуз, футболиан райондин команда уьбхбан бадали кюмекар тувра. Дугъу гьацира «Марцци юкIв» кIуру рягьимлувалин серенжемар гъахузра кюмек апIури шулу.
Амирбег Мирзахановди, 2022-пи йисанра Гюгьрягъ гъул’ан Жулжгъарин ря-къюхънара асфальт улубзуз пулин дакьатариинди кюмек апIурза кIури, гаф тувну.
Табасаран райондин руководствойиканра му кас гизаф разиди ву. «Дурарихъди сатIи жюрбежюр ляхнар апIуз гизаф рягьятди ву», – гъапнийи дугъу. Гьаддиз учв жара ляхнар тамам апIбазра кюмек тувуз гьязур вуйиваликан мялум гъапIну.
Гюгьрягъ гъулан жямяаьтдира му касдиз чан терефнаан аьхю чухсагъул мялум апIура.
Гъит ихь далу терефариъ дуланмиш шулайи, багъри ватандихъан юкIв убгурайи гьамцдар бажаранлу баяр артухъ ишри, дурариз артухъси дакьатар гъазанмиш апIуз жандин сагъ’вал туври.
