Дагъустан Республика 2021-2022-пи йисарин кьюрдун фаслихьна гьязур хьувал республикайин Правительствойин председатель Аьбдулпятягь Амирхановди чан гюзчиваликкна гъадабгъна.
Мидиз улихьна йисарихъди тевиш, цци, кьюрдун фаслихьна гьязур шули, республикайин ЖКХ-йин цирклиъ хайлин дигиш’валар духьна.
РД-йин энергетикайин ва ЖКХ-йин министерствойиан туврайи мялуматариинди, гъийин йигъаз республикайин вари муниципалитетар сатIиди гьисабназ гъадагъиш, 10,89 миллион квадратдин метрин яшамиш шлу хулариъ расвалин ляхнар кIули духна, 472 котельнйир ва 20 манишин тувру кьялан пунктар рас дапIну, кьюрдухьна гьязур дапIна.
Мидланра гъайри, министерствойин пресс-гъул-лугънаан туврайи мялуматариинди, кьюрдухьна гьязур шули, республикайиъ 58,5 километрин штун турбйир рас апIбан ляхнар тамам дапIна, 17,6 километр канализация-йин, 24,3 километр манишин тувру ва 273 километр элект-рикдин сетар лазим къайдайиз хпан ляхнар аьхирихъна духна. Гьадрарихъди сабси кьюрдун фаслихьна трансформаторарин 1278 аьдад подстанцйирра гьязур дапIна.
Кьюрдун фаслихьна гьязур шули, республикайин агьалйир электроэнергияйихъдира тямин апIбан ляхнарра ккудукIна. Республикайиъ электроэнергетикайин циркил 2021-2022-пи йисарин кьюрдун фаслихьна гьязур апIбан ляхнар аьхирихъна дуфнайивализ лигну, РФ-дин энергетикайин министерствойи Дагъустан Республикайиз «Гьязурлугвалин паспорт» тувнайиваликан улихьна йи-гъари Дагъустандин РИА-йин конференцйир гъахру майдандиин «Россети Кафари Кавказ» – «Дагэнерго» ПАО-йин филиалин вакил Къурбан Уьмаровди мялум гъапIну.
Дугъан гафариинди, кьюрдун фаслихьна гьязур хьпан серенжемар кIули гъахури, «Россети Кафари Кавказ» – «Дагэнерго» ПАО-йин филиали хайлин ляхин тамам дапIна. Цирклин кьюрдухьна гьязур хьпан программа уьмриз кечирмиш апIури, электрикдин симар дизигнайи 7120 дестгар гьюдюхну. Му кьадар мидиз улихьна йисаритIан 20 ражари артухъди ву. 146,8 тоннайин электрикдин симар ва гизаф гъагъишин алабхънайи 109 трансформатор гьюдюхну.
Ав, ЖКХ-йин циркил рес-публикайиъ артмиш апIу-райи асас циркларикан саб ву, амма гьелелиг цирклихьан, ужудар натижйир улупури, улихь гъябгъюз шуладар. Гьял дарапIди гъузнайи читин месэлйирра ими.
Мисал вуди гъадабгъиш, магьа ноябрин вазра аьхирихъна гъюра. Ихь республика думукьан учIру аьхъюшнар шлуб даршра, инсанар яшамиш шулайи хулариз манишин вахтниинди тувну ккунду. Хъа, гьяйифки, гьелелиг республикайиъ му ляхин аьхирихъна дуфнадар. Улихьна йигъари «Табасарандин нурар» газатдин редакцияйиз Дербент шагьрин Расулбеговдин ччвурнахъ хъайи кючейиъ айи 11-пи нумрайин гизаф мертебйирин хулаъ манишин адрувалин гьякьнаан аьрза гъафнийи. Аьрзачийин гафариинди, 20-пи ноябризкьан ужагъариъ лап аьхъюди вуйивалиан бицIидар иццру гъахьну. Сар аьрзачи ваъ, вари хулаъ яшамиш шулайи агьалйирра гьациб гьялнаъ айи. Учу газатдин редакцияйиан республикайин Госжилинспекцияйиз хабар дебккбан кьяляхъ, гизаф мертебйирин му хал манишнахъди тямин гъапIну.
Му жюрейин месэлйир фукьан вушра хуз шулу. Намуслувалиинди ляхин дарапIрайи УК-арин кIулиъ айидар себеб духьну, натижайиъ тахсир ктру касар аьзабнакк ккахьра. Саб Дербент шагьриъ ваъ, республикайин Къизилюрт, Избербаш ва Кьибла Сухокумск шагьрариъра манишнахъди тямин дапIну адру хулар гьелелиг гъузна кIури, РД-йин мин-энергойин пресс-гъуллугънаан къайд гъапIнийи.
РД-йин Правительствойин председатель Аьбдулпятягь Амирхановди ЖКХ-йин месэлйириз бахш дапIнайи совещаниейиъ вахтназ вуди РД-йин энергетикайинна ЖКХ-йин министрин вазифйир тамам апIурайи Ризван Мурадовдикан багарихьди манишин адру хулариъ айи агьалйир манишнахъди чарасуз вуди тямин, гъузнайи читин месэлйир гьял апIуб тIалаб гъапIнийи.
