Гьаму йигъари РД-йин МЧС-дин кIулиъ айи Нариман Къазимягьямедовдин регьберваликкди Хив райондин сяргьятариин ерлешмиш духьнайи цIа ктIубшвбанна хатIалу дюшюшариъ кюмек тувру дестйирин гьякьикьат, райондиъ айи образованиейин идарйир цIихьан уьрхбан хатIасузвал ва райондин ругариин ерлешмиш духьнайи штун гъурулушарин хатIасузвал уьбхбан гьякьикьат ахтармиш гъапIну.
Гъуху ахтармишарин натижайиъ Хив райондин администрацияйин конференц-залиъ, Кьурагь, Агъул ва СтIал-Сулейман районарин главйирин иштирак’валра ади, совещание кIули гъубшну.
Улупнайи районарин аьтрафариин жямяаьтлугъ хатIасузвал яратмиш апIбан ва уьбхбан жигьатнаан улхури, РД-йин МЧС-дин кIулиъ айи Нариман Къазимягьямедовди къайд гъапIганси, цIихьан ва арайиз гъюз мумкинвал айи аьлава хатIалу дюшюшарихьан агьалйир ва социальный тешкилатар уьрхбаъ аьхю мяна а.
Фицики, улхбариан мялум шулайиганси, улупнайи вахтназ Хив райондин аьтрафариин 36 мектебди ляхин апIура. Му гьисабнаан 35 мектебдиъ цIа кабхъбан гьякьнаан жавабдар гъуллугъназ хабар тувбан гъурулушар дивбан уьлчмйир кьабул дапIна. Амма, гьадму саб вахтна, дурарин асас пай лихурадар. ЦIа кабхъбан дюшюшарихьан уьрхбан бадали, кьабул дапIну ккуни аьлава серенжемарикан гъулхиш, му-шваъра аьгьвалат думукьан рази хьуз шлубсиб дар.
Хъа агьалйири ишлетмиш апIурайи штун гъурулушарикан гъапиш, гъахурайи серенжемар жанлу апIбан чарасузвал а.
Нариман Къазимягьяме-довди субут гъапIганси, гъи гьам республикайин кIулиъ айидари, гьамсана федеральный МЧС-дин дережайиъди йишвариин агьалйирин хатIасузвал уьбхбаз лазим вуйи вари жюрейин кюмек тувра.
– Гъи ухьу мина я сар-сарик тахсир кипуз, ясана сар-сарин гъабхурайи ляхин тянкьид апIуз уч духьнайидар дархьа. Гъи ухькан гьарсариз, ерли йишвариин гъузрайи камивалар терг апIбан бадали, аьгьвалат ачухъ дапIну, читин месэлйир сатIиди гьял апIувал важиблу вухьуз. Учу жямяаьтлугъ хатIасузвал уьбхбаз лазим вуйи шартIар яратмиш апIуз гьязур вуча. Анжагъ учву (районарин главйирихьинди илтIикIури) ичв терефнаан гъахурайи серенжемарин маракьлувал улупай. Дидихъди сабси, йишвариин агьалйирин хатIасузвал уьбхбаъ, арайиз гъафи ЧС вахтниинди гьял апIбаъ ЕДДС-арин вакиларира аьхю роль уйнамиш апIура. Мурар гьавайи гафар дар. Мисалназ, ккудубшу йисан ЦIанитI гъулаъ, цIа кабхъну, дибдиан хулар улдугувалиъ зиихъ улупнайи вакиларин вижнасузвалин, ясана ляхин тамамди аьгъдрувалин гъалатI аьхюб ву. Улупнайи месэлайин гьякьнаан аьгьвалат дигиш апIбан бадали, республикайин МЧС-дин жавабдар вакилари пишекарвалин дережа за апIбан курсар тешкил дапIна. Иштирак йихьай, ляхин ужуб дережайиъди ккабалгай, – гъапну Н.Къазимягьямедовди.
Совещаниейиъ мялум гъапIганси, багарихьди Агъул райондиъ РД-йин МЧС-дин терефнаан цIа ктIубшвру часть ачмиш апIуз гьязур ву. Месэла гьял апIувал райондин терефнаан лазим вуйи шартIариз тялукь жил улупайиз дийибгъна.
Серенжемдин аьхириъ Хив райондин глава Ярмет Ярметовди, райондиъ гъузрайи камиваларикан улхури, Нариман Къазимягьямедовдиз улупнайи месэлйир гьял апIбаъ фунуб вахтнара кюмек туврайивализ чухсагъул мялум гъапIну.
