Ноябрин вазлин аьхиримжи элгьет йигъан ихь уьлкейиъ къайд апIури шлу дадйирин Йигъан улихь му багьалу касди гьарсар инсандин уьмриъ уйнамиш апIурайи роликан пуз ккундузуз, фицики дидин кьиматлувал гьисаб дапIну ккудубкIуз шлуб дар.

 

Сифтена-сифте бицIириз уьмур тувну, хъасин думу дюн’яйихъди таниш дапIну, умудлувалиинди ликар алдагъуз улупну, уьмурлугъ вуди аку ригъдин кIанакк дугъаз ужубсиб йишв абгури, дадайи чан уьмур велед бадали харж апIуру.

БицIиризра дада – вари дюн’я ву, гьаз гъапиш дадайин веледдихьна айи ккунивалин гьиссну дугъаз вари жюрейин гъулайвалар арайиз хуз гъитра. Велед бадали, дугъаз рягьят ва лайикьлу гележег ккабалгури, дишагьлийи чан гележегдикан вуйи хиялар-ниятар фикриан ктIуршвура. БицIирихъан вуйи жавабдарвалин гьисснан кьувватну варибдин зиин агъавал апIуз гъит ра.

Гьадму саб вахтна бицIирира чан гъиллигъар ва кьиматлувалар абйир-бабарихъан гъадагъура, дурар чешнеди дидисну, гележегдиъ дурариз ухшар хьуз чалишмиш шула. Гьаддиз дадавал – варитIан жавабдар, гьаммишандиз вуйи, вахт ва йишв адру, амма дишагьли бахтлу апIру гьисс ву.
Гирами дадйир! Гъит велед бадали учву зигурайи зегьметну ужудар натижйир туври!

Багъри дада

Сифтейин сес яв ебхьуру,
Яв багъри хил дарман шулу,
Уву ширинди рякъюру,
Улариз акв туву дада.
Дюн’яйиз шул гизаф девлет,
Заан шадвал, артухъ гьюрмат,
Амма дурар узуз, гьелбет,
УвутIан артухъ дар, дада.

Сифте гъахьи велед гъяркъган,
Сифте увуз «дада» пиган,
Узу сабпи лик алдабгъган,
Фукьан шад гъахьнийкIан дада.

Фукьан йишвар гъяру нивкIсуз,
Дибрихъди вахт ипIуз, деуз,
Фукьан йисар гъяру уьрхюз,
Яв юкIв али велед, дада.

Гъашиш велед цIибкьан нахуш,
Уьл дирипIди, жан гъабхьиш буш,
Фукьан дердер увуз шулуш,
Рякъюра гьарсариз, дада.

Аьбдулгьюсей Кьасумов