Риш швуваз гъахуз жамар дуфнайи вахтна, дадайин кIваъ швнуб жюрейин фикир ади шулуш, анжагъ гьадгъазтIан хабар дар. Жигьил фицир вуйкIан? Дугъкан ужур жилир шуйкIан? Йиз шураз гиран ктапIуйкIан? Ва хъана варжариинди суалар…

 

Му саки гьарсар дишагьлийин уьмриъ шулайи ляхникан бикIуз узуз кьюб гьяфта мидиз улихьна гъабхьи йиз багахьлуйирин сумчри амур гъапIну. Дурарин хизандиъ шубур ришна сар бай а. Сумчир аьхюну шуран вуйи. Гьяйиф, узхьан дина гъягъюз гъабхьундар, амма гъийин деврин гьиишнари вари серенжемариъ иштирак хьуз кюмек апIуру.

Гьамци, швуваз риш хъаърайи дадайиз мубаракнан гафар пуб кIваъ ади, дугъаз телефондиан зенг гъапIза. Дугъан жавабнак кайикьан дерд, русвагьвал ва пашманвал гъеебхьиган, йиз уьмриъ сабпи ражари риш гъахурайи дадайин йишв’ин узу алиси гъабхьунзуз. Гьамусдиз фукьан хайрар-шейрариз гъягъюри, шадвал апIури, думу йигъан дадайин юкIв тIубкIури шлуваликан хабаркьан адайзуз.

Ухьуз сумчриъ рябкъруб анжагъ шадди айи машар ву. Хъа гьамус варибдин гъавриъ гъахьунза. Дадайи гьар ражари риш швуваз хъаъруган, йиз фикриан, дугъаз гюмбет диври ккунду, гьаз гъапиш мициб игитвал пешкеш дарди гъибтувал дюз дар.

Му гьядисайин кьяляхъ, узу, йиз хьуд йис тамам шулайи риш аьхю гъахьиган, фици жара жвуван хулаз гьаъру кIури, фикир гъапIунза. КIваз гизаф гъагъи гъабхьнийиз. Садпи гамар алдагъуз улупну, хилиъ муччвур бисуз улупну, мектеб сатIиди ккадапIну, жвуваз аьгъюбдикан вари улупури вердиш гъапIу риш сад йигъандин арайиъ яв багхьан гъягъюру. Хъа думу ляхин уьмрин саб жара апIуз даршлу пай вуйиваликан кIваин гъапIган, сацIиб рягьят гъабхьунзуз. Инсандихьан дюн’яйин къанунарихьан гьергуз шулдар. Амма гьамус йиз кIулиъ жара фикир либцура: узу сар риш швуваз тувдиза, хъа йиз бабу йирхьур риш фици швуваз тувнийкIан? Чан кIваъ йирхьуб хизандин шадваларна дердар фици гъюрхнийкIан дугъу?

Гьяйифки, гьамус думу суалназ жаваб бихъидар: узу му ляхнин гъавриъ хьайиз, баб Аллагьдин рягьматдиз гъушну. Гьаддиз, аьзиз дадйир, учвуз суал вуйиз: жвуван уьмрин тики швуваз тувуз кьувват наънан абгуру?