ТIивак гъулан поселение 1995-пи йисан арайиз гъафиб ву. Думу Табасаран райондин варитIан аьхю советарикан саб ву, ва диди шубуб райондин сяргьятарихъди гъуншивал апIура: Гъяйтагъ райондин Рука ва ЖавгъатI гъуларихъди, Дахадаев райондин ятгъарихъди, Дербент райондин КIежух гъулахъди. ТIивак гъулан администрацияйин дахилнаъ шубуб гъул а: ТIивак, ХустIил ва Гурхун. Думу гъулариъ 3400 кас яшамиш шула.
Гьяжиев Ибрагьим Гьяжиевич 1962-пи йисан 26-пи августдиъ Табасаран райондин ТIивак гъулаъ бабкан гъахьну. Дугъу 1980-пи йисан ТIиварин кьялан мектеб ккудубкIну, хъа 1980-1982-пи йисари Советарин армияйин жергйириъ чан буржи тамам апIури гъахьну.
Ибрагьим Гьяжиев 1982-пи йисан Москвайиъ айи Тимирязевдин академияйик урхуз кучIвну ва 1988-пи йисан думу ккудубкIну. 2004-пи йисхъанмина ТIиварин советдин главади лихура.
Улихьна йигъари ич хусуси мухбир Ражаб Нуровди 2004-пи йисхъанмина ТIивак гъулан поселениейин главади лихурайи Ибрагьим Гьяжиевдихьан интервью гъадабгъну. Думу исихъ чап апIурача.
– Ибрагьим Гьяжиевич,ТIивак гъулан поселениейин аьтрафариин фицдар жямяаьтлугъ мяна айи идарйир ал?
– ТIивак гъулан советдин аьтрафариин 3 мектеб, 2 ФАП ва 1 духтирвалин амбулатория, 2 бицIидарин багъ ерлешмиш духьна. Дидлан савайи, 2 культурайин хал (ТIивак ва Гурхун гъулариъ) ва 1 клуб (ХустIил гъулаъ) а.
– Гъулан советдин дахилнаъ айи жиларин уьмуми кьадар фукьан ву ва дурар фици ишлетмиш апIура?
– Гъулан поселениейин дахилнаъ айи вари жиларин кьадар 3353 гектар ву, гьадму гьисабнаан 454 гектар хутIлари, 147 гектар жюрбежюр бахчйири, 215 гектар тIумтIарин ва жара йимишарин багълари ккаъна.
– Гъулан поселениейин аьтрафариин али образованиейин идарйирин гьял фициб ву?
– Узу улихьнаси гъапиганси, ич советдиъ ляхник шубуб мектеб кирчна. Юсуф Базутаевдин ччвурнахъ хъайи ТIиварин кьялан мектебдиъ 342 балина шуру урхура, дурарикан 132 бицIири ккергъбан классариъ. 2019-пи йисан мектебдин гъвардниккишв рас гъапIну ва 2 миллионна 200 агъзур манатдин айтIан ляхнар кIули гъухну. ХустIларин кьялан мектебдиъ 59 бицIири, Гурхнарин кьялан мектебдиъ 75 бицIири урхура. 2020-пи йисан кьюбиб мектебариъра дибдиан расвалин ляхнар кIули духна, ХустIларин мектебдиъ – 2 миллион манаттIан артухъ, Гурхнарин мектебдиъ – 2 миллионна 700 агъзур манаттIан артухъ дакьатар ишлетмиш дапIна.
– Ибрагьим Гьяжиевич, уву гизаф йисари ТIивак гъулан поселениейин главади лихурава. Инсанарин яшайиш ужу апIбан бадали фицдар ляхнар дапIнава?
– Гъулан поселениейин шуббиб гъуларизра газар дизигна, акварин месэлара гьял дапIна. 2021-пи йисан ТIивак гъулаъ кьюб 100 кВа айи трансформаторарра дивунча.
ЦIийиди асфальт улубзнайи кючйирин гъирагъдихъди шид гъябгъру турбйирра хъирчна. Мектебдин улихь хьайи булагъра рас дапIнача, дина 1 километрна 500 метр манзилнаъди 32 миллиметр турбара дизигна. ХустIил гъулаз гъябгъру рякъюъ бетон убзбан бадали, учуз 5 КамАЗ-диъди бетон ва сетка, булагъ рас апIбан бадали, лазим вуйи шей’ар жара дапIна. Гурхун гъулаъ рякъюхъди шид гъябгъбан бадали, ккирчру турбйирра масу гъадагъна. 2021-пи йисан уч дапIнайи транспортдин налогарин саб миллиондихьна манатдихъ Гурхун гъулаъ саб километрин манзилнаъди кючера рас дапIна. Рякъюн гъирагъдихъ хъирчру турбйир масу гъадагъузра 100 000 манат пул деебтну. Дидланра савайи, Гурхун гъулаъ тикмиш апIурайи ФАП-ра ккудубкIура, дидихьна 200 метр манзилнаъди акварра дизигна. ТIивак гъулаъ асфальт улубзнайи рякъярихъ лазим вуйи лишнарра дивнача. Гъулан поселениейин гъулариъ айи кючйир рас апIбан бадали, 185 000 манатдин проектар дапIна.
Саб хайлин ляхин тамам дапIнача, хъа дапIну ккуни ляхнарра гизаф ими. Учуз апIурайи кюмекариз лигну, Табасаран райондин кIулиъ айидариз аьхю чухсагъул мялум апIурача.
— Чухсагъул, Ибрагьим Гьяжиевич. Ляхниъ хъуркьувалар ишривуз.
