Декабрин 23-пи йигъан Урусатдин Президент Владимир Путинди аьхю пресс-конференция кIули гъубхну. Дугъу журналистарин жюрбежюр суалариз жавабар тувну.
Пресс-конференция Владимир Путинди COVID-19 уьзрихъди аьлакьалу тIягъвни Урусатдин экономикайиз гъапIу тясирнакан, агьалйирин арайиъ вакцинация гъабхбан ва Центробанкдин ляхникан вуйи суалариз жавабар тувбиинди ачмиш гъапIнийи. Урусатдин Президентдин фикриинди, тIягъвнин вахтна уьлкейин экономикайин дережа 3 проценттIан ис гъабхьундайи, думура гьяракатниинди за апIуз мумкинвал гъабхьнийи. Коронавирусдин тIягъвни Урусатдин экономикайизтIан харижи уьлкйирин экономикайиз артухъ зарар тувну. Урусатдин экономикайин гизаф цирклар гьяракатниинди артмиш шула. Гьаму йисан тикилишчивалин цирклиъ 90 миллион квадратдин метр яшамиш шлу хулар тикмиш дапIна. Владимир Путиндин гьисабариинди, тIягъвнин вахтна РФ-дин Правительствойи ва ЦБ-йи гъапIу ляхниз харжи кьимат тувуз шулдар.
ТIягъвни инсандин уьмрин ярхивализ тясир гъапIну, улихьди уьмрин ярхишин кьялан гьисабниинди 71,5 йис вуйиш, гьамус 71 йис дубхьна.
«Уьлкейин аьтрафар лап аьхюдар ву, мушваъ дуланмиш шулайи 146 миллион кас агьалйир Урусатдиз лап цIибди ву. Ухьуз ляхин апIру хилар гьуркIрадар.
Вакцинайин рубар йивувалианра кьяляхъ хъахьа. Ухьухь коллективдин иммунитет яратмиш апIбан бадали, гьамусдиз 59,4 % ватанагьлийириз рубар йивна, хъа ухьуз 80% ватандашариз рубар йивувал лазим ву. Гуж апIури вакцинайин рубар йивувал лазим дар, инсанар гъаврикк ккаъну ккунду.
Уьлкейин бюджет агьалйирин яшайишдин дережа за апIуз яратмиш апIурайиб ву. Гъюру йисаз, регионариъ апIру харжар ктарди, яшайишдин харжариз 4 триллион манат деебтуз планламиш дапIна.
2022-пи йисан сабпи 6 вазлиъ Генеральный прокуратурайи агьалйир ляхнихъди тямин апIру центрарин бикарвалихъди аьлакьалу пособйир тувбан ляхин ахтармиш апIиди», — гъапнийи Президентди.
Владимир Путинди Урусатдин чIатан политикайикан, Ригъ алабхъру терефнаъ айи уьлкйирин гьякьнаан, НАТО-йикан ва Украинайикан вуйи суаларизра хъайи-хъайиси жавабар тувнийи: ихь гьяракатар Урусатдин хатIасузвал тямин апIбахъди аьлакьалу ву. «Донбассдин гележег – Донбассдин агьалйирикан асиллу ву, жараси хьузра мумкин дар», – гъапну Владимир Путинди.
Пресс-конференцияйиъ Вла-димир Путинди Европайиъ арайиз дуфнайи газдихъди аьлакьалу кризисдин, Газпромдик ва Урусатдик кирчрайи тахсиркарваларин гьякьнаан мюгькам жавабар тувнийи.
Агьалйир даргъурайи хулариан цIийи хулариз адаъбан программа пулихъди тямин апIбан месэлйириканра гъулхнийи. «Ухьу инсанар даргъурайи хулариан адаъну ккунду… Программа гьязур апIура, пулра жара апIиди», –мялум гъапIну Владимир Путинди.
Демографияйин гьякьнаан вуйи суалназ жаваб туври, Президентди ужуб яшайиш ва ужуб гъуллугъ важиблу вуйиваликан, хъа жигьилар ужуб, бахтлу, веледар айи хизандин кьиматлувал заанди вуйивалин гъаврикк ккаъну ккуниваликан гъапну.
Владимир Путиндихъди вуйи пресс-конференцияйиз душнайи «Дагъустан» РИА-йин директор Мягьямед Мягьямедовди, Урусатдин Президентдин Дагъустандихьна вуйи ккунивал кIваин дапIну, республикайиъ федеральный центрин кюмек дарди гьял апIуз читинди вуйи, коммерцияйин компанйирин хусусиятнаъ айи газдин, электроэнергияйин, штун гъурулушарин месэлйир гъитIирккнийи.
Владимир Путинди гьадму месэлйирин гьякьнаан жаваб тувуз учв гьязурди адруваликан, хъа лап багарихьди дурариз жаваб гьязур шлуваликан гъапнийи.
