Ич хизандиъ улихьна йисари саб дюшюш гъабхьну. Думу кми-кмиди аьхю аьшкьниинди кIваин апIури шулча. Саб ражари ЦIийи йис улубкьайиз сад-кьюд йигъ ккимиди, ич сабпи классдиз гъягъюрайи риш мектебдиан лап пашманди гъафнийи. 

 

Дугъаз мектебдин заан классариъ урхурайи баяр-шубари Йифун Аба адруваликан ва ЦIийи йисаз пешкешар абйир-бабари масу гъадагъурайиваликан гъапнийи. Дугъу, улар нивгъари ацIну, учуз мидкан ктибтнийи. Узу ва жилири риш ккаарцуз хъюгънийча. Ва, риш ич гафарихъ хъугъри кIури, Йифун Абайиз узура, жилирира кагъзар гъидикIнийча. Дугъу, учухьинди мюгьталди лигури, сацIиб рази духьну, чавра кагъаз бикIуз хъюгъю.

Кагъзик узу Йифун Абайиз палтар урччру автомат машин пешкеш апIуб ккун гъапIнийза. Дишди гъапиш, учуз дициб машин масу гъадабгъуз пулин мумкинвал адайчуз. Хъа жилири учуз кьюрпи велед бай хьувал чан варитIан аьхю хиял вуйиваликан гъибикIну. Учу ич кIваъ гъидису хиялариин дяаьлхъну, Йифун Абайиз кагъзар хътаунча. Риш архаин гъахьнийи. ЦIийи Йисан, аьламатнан ляхинси, йиз пешкеш хулаз хъубкьу. Лотереяйиан ич фикрариъкьан адрубсиб ужуб машин удубчIвнийчуз. Думуган узура, жилирра Йифун Аба айивалихъ ва ЦIийи йисан сюгьюрлувалин ужудар аьламатар улуркьрувалихъ хъугънийча. Думу йисан байра гъахьнийчуз. Дидхъан мина учу гьар йисан Йифун Абайиз кагъзар дикIурача.