1995-пи йисхъанмина 27-пи декабриъ МЧС-дин гъуллугъчйири инсанар бедбахтваларихьан уьрхрурин Йигъ къайд апIури шулу. Дурарин ляхин бедбахтвалиъ ахънайидариз вахтниинди кюмекназ хъуркьувалихъди аьлакьалу ву. Гьаму улихьна йигъари узу РД-йин МЧС-дин Табасаран райондиъ айи цIа кабхъуваларин дюшюшарихьан уьрхбан 23-пи нумрайин частнан начальник Акиф Аьлипашаевдихъди гюрюшмиш гъахьунза ва дугъахъди сюгьбат гъубхунза.
– Акиф Мислимович, 2021-пи йисан РД-йиъ айи МЧС-дин Табасаран райондиъ ерлешмиш дубхьнайи 23-пи частназ хатIалу дюшюшарикан фукьан хабрар гъафну?
– Ич 23-пи нумрайин частназ 2021-пи йисан 48 хатIалу дюшюшарин гьякьнаан хабрар гъафну: укIак, машинарик, инсанар яшамиш шулайи хуларик ва идарйирик цIа кабхъувалин. Дупну ккундуки, 2020-пи йисан цIийир кархьуваларин гьякьанаан 59 хабар гъафнийи. Ич асас вазифа — къурху хабар кубкIбуси, цIа фтикан кабхънуш аьгъю дапIну, дидин улихьишв бисуб, гьелбетки, сабпи нубатнаъди инсанариз кюмек дапIну, цIf ктIубшвувал.
– Ичв идарайиъ лихурайидарихъди цIа ктIубшвбаан аьгъюваларин дережа за апIбан ва техникайиз гъуллугъ апIуз вердиш хьпаан фицдар серенжемар гъахури шулучва?
– 2021-пи йисан 25-пи ноябриъ Хючнаарин сабпи нумрайин лицейдиъ, цIа ктIубшвбан бадали, фицдар уьлмчйир кьабул дапIну ккундуш, ва МЧС-дин гъуллугъчйир дидихьна фици гьязур духьнаш аьгъю апIбан бадали, аьхю серенжемар кIули гъушну. Дурари, мектебдиъ урхурайидар гьяятдиз адаъну, кьюб цIа ктIубшвру машинарихъди саб бицIи вахтнан арайиъ цIа фици ктIубшвуруш, чпи му ляхин апIбахьна фици гьязур вуш, улупну. Серенжемдин дахилнаъди лицейдин гьяятдиъ ерлешмиш дубхьнайи шид айи резервуарра ахтармиш гъапIну.
МЧС-дин гъуллугъчйири, бедбахтвалин дюшюшдикан хабар гъафибси дина вахтниинди хъуркьбан бадали, техника гьарган гьязурди гъибтра. Гьацира дурари, физкультурайин терефнаан гьязурлугвал уьбхбан бадали, гьаммишан жюрбежюр серенжемар кIули гъахури шулу.
– Аьхиримжи вахтна Табасаран райондиъ фицдар хатIалу дюшюшар терг апIуб алабхъунчвуз?
– 2021-пи йисан 26-пи декабриъ 23-пи нумрайин ПСЧ-йиз, Дербентдиан Хючназ гъюру рякъюн 40-пи километриъ, Асккан Ягъдигъарин гъулахъ Хёндай Солярис машинди сар кас ккаъну кIури, хатIалу хабар гъафну. Думу хабар кубкIубси, ич бригада дина гъубшну, душвахь хатIа гъабхьи кас дишлади больницайиз гъахну.
Цци 16-пи ноябриъ ЦIийи Лижв’ан, складдик цIа кабхъа кIури, хабар гъафнийи. Думуганра 90 кв. метрин йишв’ин али складдик кабхънайи цIа саб бицIи вахтнан арайиъ ктIубшвунча. 5-пи ноябриъ ПСЧ-йиз, Туриф гъулаъ хуларин зиин али чардагъ убгура кIури, сабсана хатIалу хабар гъафну. Душваъра ич гъуллугъчйири гъуландарин кюмекниинди цIа вахтниинди ктIубшвну ва думу хулан эйсийин мутму гъюбхну. Гьяйифки, 15 кв. метр али саб хал гъубгну.
– Ляхниъ фицдар читинвалар алахьурачвуз?
– ВаритIан читин месэлйир шид гъадабгъуз шлу йишвар цIибтIан адрувал ва лазим вуйи йишвахьна вахтниинди кюмекназ хъуркьуз даршлувал ву.
– Акиф Мислимович, ичв пишекарвалин машквар мубарак ибшри, халкь бадали апIурайи читин ляхниъ хатIа-балайихьан Аллагьди уьрхричву.
