2021-пи йисан 24-пи декабриан 26 декабризкьан Краснодариъ грекаринна римдин юкьяр дисбан спортдиан жигьиларин арайиъ дюн’яйин ва Европайин чемпион, Урусатдин спортдин лайикьлу устад Степан Мариняндин пешкешариз вуйи Рождествойин 4-пи турнир кIули гъубшну. Душваъ ихь ватанагьли, Табасаран райондин Ярса гъул’ан вуйи Темирлан Амирхановдира иштирак’вал гъапIну. Темирланди турнириъ 52 кило гъагъишин айи спортсменарин арайиъ сабпи йишв гъибисну. Талитариъ сабпи йишв гъадабгъбаз лигну, думу кубок, медаль ва грамота тувбиинди лишанлу гъапIну. Дугъан тренер Аьлимедет Исмяилов ву.

 

Темирлан Амирхановди 2019-пи йисхъанмина Дагъустан Республикайин олимпиадйириз спорт-сменар гьязур апIру спортдин мектебдиъ гьязурлугар гъахури гъахьну. Му бажаранлу бицIи игит гьацира Дагъустан Республикайин ва Урусатдин саб хайлин турнирариъ иштирак гъахьну ва дугъу учв заан дережайин устад вуйиб улупну. Дугъриданра, чемпионар бабкан шлуган чемпионарди шули аьдат дар, дурари чпин зегьметниинди му хъуркьувалар гъазанмиш апIуру.
Темирлан Амирханов 2008-пи йисан 18-пи июндиъ Табасаран райондин Ярса гъулаъ бабкан гъахьну. Гьамусяаьт дурарин хизан Мягьячгъала шагьриъ яшамиш шула. Темирланди Мягьячгъала шагьриъ айи 29-пи нумрайин мектебдин 7-пи классдиъ урхура.

Ухьу Темирландиз хъана заан хъуркьувалар ккун апIурахьа. Гъит ихь жигьиларин арайиъ мицдар игитар хъана артухъ ишри.