Варидариз мялум вуйиганси, улубкьу цIийи йисан майдин вазлиъ Бразилияйин Кашиас-ду-сул шагьриъ хьадан 24-пи Сурдлимпийский талитар кIули гъягъюру. Думу талитариъ затра вая лап гъагъидитIан деребхьру спортсменар иштирак хьиди, гьадрарин арайиъ дагъустандин тхэквондистарра. Дурарин арайиъ гъубшу йисан ноябрь вазлиъ вари дюн’яйин чемпионатдиъ гъалиб гъахьи спортсмен Шамил Исакьовра а.
Шамил Исакьовдилан ва жара тхэквондистарилан гъайри, Сурдлимпийский турнирариз Дагъустандиан спортдин юкьяр дисбан жюр-йирин кчIихбариин ва бокс-диин машгъул вуйи спорт-сменарра гъягъиди. Хъа фужар гъягъюруш, гъябгъюрайи йисан январь-февраль вазари Урусатдин чемпионатдин натижйириъ мялум шулу. Уьмуми гьисабариинди, Бразилияйиз ихь республикайин 20 касдихьна спортсменар гъягъюз мумкинвал а. Къайд апIуз ккундучуз, Урусатдин Сурдлимпийский комитетдин президентди ихь ватанагьли Гьямзатгьяжи Камилов тяйин гъапIну.
Шамил Исакьович Исакьов 1996-пи йисан 2-пи апрелиъ Дагъустандин Гумбетовский райондин Аргвани гъулаъ бабкан гъахьну. Думу 2017-пи йисан Сурдлимпийский талитариъ пешкешнан йишван сагьиб, Урусатдин машгьур тхэквондист, спортдин лайикьлу мастер ву.
Бабкан духьну шубуд йис хьайиз, Шамилин абйир-бабариз дугъхьан гафар апIуз даршлуваликан ва дугъаз деребхьрайиваликан затра хабар адайи. Шамилин адаш Исакьди гъапиганси, балин иццрушнакан хабар гъабхьибси, дугъан абйир-бабар чпин мяишат гъибтну, багъри гъул’ан Мягьячгъала шагьриз кючмиш шулу. Адашди ва дадайи бай сагъ апIуз хайлин йишварихьна гъахури гъахьну. Амма вари духтрари, балин уьзур сагъ апIуз мумкинвалар адрувал улупури, кIулар тIурччвури гъахьнийи.
Шамилин яш 10 йис гъабхьиган, думу спортдиин машгъул шулу. Жигьил хьуб ражари Урусатдин чемпион, 2019-пи йисан Европайин чемпионатдин гъалибчи ва гьадму йисан Турцияйин Самсун шагьриъ кIули гъушу Сурдлимпийский талитарин кьюбпи йишван сагьиб гъахьну. Гьамусяаьт Шамил Бразилияйиъ майдин вазлиъ кIули гъягъру Сурдлимпийский талитарихьна гьязур шула.
