Ккудубшу йисан 27-пи декабриан 30-пи декабризкьан Москва шагьриъ ACBJJ WORLD OPEN CHAMPIONSHIP GI & NO — GI 2021 вари дюн’яйин чемпионат кIули гъубшну.
Му чемпионатдиъ Урусатдианси, Казахстандиан, Азербайжандиан, США-йиан, Бразилияйиан, Японияйиан, Францияйиан ва хайлин жара гьюкуматариан грепплинг ва джиу-джитсу спортдин жюр-йириин машгъул духьнайи ужударстар спортсменар иштирак гъахьну. Дурарин арайиъ Дагъустандианра хайлин спортсменар айи. Гьадму гьисабнаан хайлин табасаран баярра думу чемпионатдиъ иштирак гъахьну ва, чемпионар духьну, кьяляхъ гъафну.
Хив райондин Зюрдягъ гъулан агьали, гьамусяаьт Дербент шагьриъ яшамиш шулайи Вагиф Шихгьясанов грепплингдиан талитариъ 90 килограмм гъагъ айи спортсменарин арайиъ вари дюн’яйин чемпион гъахьну.
Табасаран райондин Ружвникк гъулан агьали, Мягьячгъалайиъ яшамиш шулайи Латиф Сулеймановди спортдин грепплинг жюре-йиан 85 килограмм гъагъишин айидарин категорияйиъ вари дюн’яйин чемпионвал гъазанмиш гъапIну.
Табасаран райондин Хючна гъулан агьали Рамазан Гьясратов спортдин грепплинг жюрейиан 77 килограммг гъагъишин айидарин категорияйиъ сабпи йишван сагьиб гъахьну.
Табасаран райондин Гюгьрягъ гъул’ан Мягьячгъалайиз кючмиш духьнайи Аллагьверди Ашурбеговди грепплингдиан 75 килограмм гъагъишин айи спортсменарин арайиъ вари дюн’яйин чемпионвалин ччвур гъазанмиш гъапIну.
Дагъустандин Огни шагьриан вуйи, чан яш 16 йис дубхьнайи Гьямзат Аьлиханов грепплингдиан абсолютный категорияйиъ дюн’яйин чемпион гъахьну.
Хив райондин Чlиллихъ гъулан агьали, Дагъустандин Огни шагьриъ яшамиш шулайи Иса Рамалданов му чемпионатдиъ 2-пи йишван сагьиб гъахьну.
Табасаран райондин Сиртlич гъулан агьали, Мягьячгъалайиъ яшамиш шулайи Марат Гьяжикъурбановди чемпионатдиъ 3-пи йишв гъазанмиш гъапIну.
Гьаму вари баяриз багарихьди газатдин редакцияйиз дих дапlну, ихь газат урхурайидар дурарихъди таниш апlидича. Фицики, гъийин йигъан спортди инсандин уьмриъ асас йишв дибисна. Гьаци вуйивализ лигну, ихь баяри ужудар натижйирра улупура. Гъит дурариз варидариз спортдиъ хъанара артухъ хъуркьувалар ишри.
