РД-йин туризмдин министерствойин пресс-гъуллугънаан мялумат тувганси, гъябгъюрайи цIийи йисандин машкврарин вахтна Дагъустандиз 105 агъзур кас хяларди гъафну. Дурарикан 21 агъзуртIан артухъ касар уьлкейин жюрбежюр регионариан дуфнайи туристар вуйи. Му улупбар гъубшу йисан тялукь вахтнахь тевиган, 19%-дин артухъди ву.
Дагъустандин туризмдин министерствойин улупбариинди, республикайин хьадан ва хьадукранна чвулин вазаритIан дилихру, туристар кьабул апIру йишвариз аьхиримжи йисари туристарин терефнаан йисандин фунуб вахт-нара маракьлувал ва игьтияж айивал рябкъюра.
«Аьхиримжи вахтна хьаднуси кьюрднура ухьухьна гъюрайи туристариз варитIан гизафси Дербент шагьриз, Сулакдин дараскьал гъяриз, Сарыкум гъумран тепейиина, Гуниб, Хунзах, Шамил, Ахцигь ва Дахадаев районарин кюгьне культурайин ва табиаьтдин тарихи ядиграрин йишвариина гъягъюз гизафси маракьлувал а. Улупнайи муниципалитетарин маракьлу йишвариина гъягъюз ккунидарин кьадар 2020-пи йисахь тевиган, 40-рилан 60-р процентдиина за гъабхьну. Хъа кьюрдун вахтна туристар ва республикайин ватандашар рягьятвал гъадабгъуз гизафси Акъуша райондин Чиндирчеро туризмдин дагъдиина ва Буйнагъск райондин Терменликдиз гъягъюру»,
– къайд апIура пресс-гъуллугънаан.
Вахтназ вуди РД-йин туризмдин министрин вазифйир тамам апIурайи Эмин Мердановди къайд гъапIиганси, экспертарин улупбариинди, 2021-пи йисан Дагъустан Республикайиз 1085 агъзур турист гъафну.
«Му улупбар 2020-пи йисахь тевиган, 29,1%-дин за духьна. 2020-пи йисан Дагъустандиз гъафи туристарин кьадар 840 агъзур вуйи. Багахь гележегдиъ республикайиз гъюрайи туристар хъана артухъ хьиди. Гьаддиз инфраструктура, туристарин цIийи тадарукар, дурарин игьтияжар заан ери-йиинди гьуркIувалиин, республикайин туризмдин цирклин рекламайинна мялуматарин дережа къайдайиз хувалиин дилихну ккунду», – гъапну министри.
Къайд апIуз ккундузуз, аьхиримжи йисари РД-йин туризмдин министерствойин ляхин «2035-пи йисаз Урусатдин Федерацияйиъ туризмдин артмиш’валин Стратегия», «2035-пи йисаз Кафари Кавказдин туризмдин артмиш’валин Стратегия» уьлкейин асас документарин программйирин ва «Туризм ва хялар кьабул апIувалин индустрия» милли проектдин бинайиинди туристарин кьадар артухъ апIбаз диш дапIна.
