Гьар йисан январин вазлин аьхиримжи элгьет йигъан (гьаму йисан думу йигъ 29-пи январиин алабхъура) телефонар, компьютерар, телевизорар, интернет адарди адапIру вари халкьарин Йигъ къайд апIуру. Гьаму жюре машкврин метлеб – вари дюн’я дибиснайи интернетдин асиллувалиан удучIвну, аьдати уьмрин мумкинвалар ишлетмиш апIури, йисандин арайиъ сад йигъкьан адапIувал ву.

 

 

Аьхиримжи йисари ухьу фукьан яманди интернетдикан асиллу духьнаш, учву ужуди фикир апIинай! Аьхюдар, бицIидар – вари, фуж телефондиан, фуж компьютериан, тмундар телевизориан интернетдин кюмекниинди жюрбежюр ляхнариин машгъул духьна. Аьхюну пай жигьиларихьан интернет дарди саб сяаьткьан адапIуз шули имдар. Улихьна йисари абйир-бабар, жигьилар, бицIидар фици яшамиш шули гъахьнуш, дурарин кIулиз фикиркьан гъюрадар. Гьамус гьарурин хилиъ телефон а, абйир-бабарихьан фуну вахтна вушра бализ-шураз дих апIуз шулу, эгер дурари дишлади жаваб тутрувиш, кIвак гъалабулугъвал кабхъру.

Гьелбетда, интернетди ихь уьмур чIур гъапIундар, рягьят гъапIну. Гьаддихъди сабси, интернетдикан асиллу вуйивали инсандин сагъ’вализ зарарра хуру. Гьаддиз йисаъ сад йигъ ваъ, шулуш гьяфтайиъ сад йигъ, хъа шулдарш – вазлин арайиъ сад йигъ вушра интернет адарди адапIуз чара апIинай.

Макьала урхурайири гьерхуз мумкин ву, хъа телефон, телевизор, компьютер дарди адапIру йигъан фициб ляхниин машгъул хьуз шулу? Гизаф ляхнариин машгъул хьуз шулу, гьарсар касдиз чан маракьар чаз ужуди аьгъя. Хъа узу вари инсанарихьан рягьятди апIуз шлу ляхнар кIваина хураза. Сад йигъ улихьна, учву агру дустариз, абйир-бабариз телефон ктIубшвурайиваликан мялум дапIну, телефон кутIубшвай. Думу йигъандин вахт жвуван сагъламвализ бахш апIинай.

Шагьриъ яшамиш шулайидарихьан бассейндиз, спортзализ, паркдиз, кинойиз, гьюлин гъирагъдихъна сейир апIуз, бицIидар хъади, дурари ергури, тамшир апIури вахт адапIру йишваз ва хъана жара йишвариз гъягъюз шулу. Эгер хул’ан удучIвуз ккундарш, ужудар хурагар гьязур дапIну, жвуван юлдшариз, багахьлуйириз, таниш инсанариз хялижвди гъювалин теклиф апIуз шулу. Хулаз хялар гъюруган, интернетдиин машгъул хьуз вахт бихъидар.

Гъулариъ яшамиш шулайидариз думу йигъ адапIуз хъана рягьятди ву – ярквраз гъягъюз шулу. Ярквру инсандин бедендиз кьувват тувру, марцци гьавайи кIулин фикрар, сагъ’вал къайдайиз хуру. Китаб урхурира вахт адапIуз шулу, интернет адру вахтари гизафдари азад геренар китабар урхури адауйи. Гьамусдин жигьиларин арайиъра китабар урхру жигьилар цIиб адар, вушра, улихьна йисари фуну суалназра жаваб ухьу интернетдиъ абгури шулдайхьа, китабар урхуйхьа.

Гьамци, интернет адарди адапIу йигъ учвуз кьабул гъабхьнуш, учуз кидибтай.