Январин 28-пи йигъан Дагъустан Республикайин Глава Сергей Меликовдин ва «Газпром» ПАО-йин Правлениейин председателин заместитель Виталий Маркеловдин регьберваликкди Газпромдин компанйирин дестйири Дагъустан Республикайин Правительствойихъди аьлакьйир тешкил апIбаз ва 2021-пи йисан 23-пи декабриъ кIули гъубшу Урусатдин Федерацияйин Президент В.В.Путиндин пресс-конференцияйиъ дугъу туву табшуругъар тамам апIбаз бахш дапIнайи совещание кIули гъубшнийи.
Совещаниейиъ республика газдихъди тямин апIбан программа уьмриз кечирмиш апIбан ва региондиъ газдин цирклин ляхин къайдайиз хувалин месэлйир гьял гъапIнийи.
«Гьюкуматдин кIулиъ айири, саб регион жаради дибисну, душваъ убг-рубдинна энергетикайин месэлйир гьял апIбан табшуругъ тувувал – гьич даршибсиб ляхин ву», – къайд гъапIну Сергей Меликовди совещаниейиъ. Дугъан гафариинди, гизаф йисарин арайиъ республикайин газдин комплексдиъ хъайи-хъайиси гьял дапIну ккуни хайлин месэлйир уч духьна: газ ишлетмиш апIурайидарин буржар, газ пай апIру гъурулушдин гьуркIри адру кьувватар, газ гъюрайи турбйир йирси хьувал, инсанар яшамиш шулайи хулариъ газдихъди аьлакьалу хатIасузвал уьбхювал ва гьацдар жарадар.
Совещание арайиъ айи важиблу месэлйир гьисабнаъ ади кIули гъубхнийи.
«Дагъустандиз улупнайи саб вуйи оператор «Газпром газификация» ООО-йин регьберваликкди республика газдихъди тямин апIбан цIийи программайи гъулар-йишвар гьяракатниинди газдихъди тямин апIуз мумкинвал тувди. Ляхин гъабхура. Газдин комплексдин артмиш’валин ляхнари, гьелбетда, варидарин кьувватар сатIи апIувал тIалаб апIура», – ачухъ гъапIну чан фикрар Сергей Меликовди.
«2020-пи йисан республикайин правительствойи ва «Газпром» ПАО-йи Дагъустан Республика 2021-пи – 2025-пи йисари газдиихъди тямин апIбан программайиин къулар гъизигнийи. Му программа уьмриз кечирмиш апIбан бадали, жара апIурайи инвестицйирин кьадар газ пай апIру станцийириз – 1,6 миллиард манат, поселокарин арайиъ айи сетариз – 11,5 миллиард манат, поселокарин айитI газар зигувализ – 666 миллион манат ву.
Натижайиъ 193 гъулариъ 41 агъзуртIан артухъ хулариз табиаьтдин газ зигуз мамкинвал хьибди», – къайд гъапIну Виталий Маркеловди.
Совещаниейин иштиракчйири гьацира республикайин сетевой мяишатдин схема тасдикь дапIну ккунивалин чарасузваликанра гъапнийи, думу схема адарди, газдин инфраструктурайин расвалин ляхнарин программа уьмриз кечирмиш апIуз хьибдар.
2022-пи йисаз планламиш дапIнайи уьлчмйир уьмриз кечирмиш апIбан важиблу шартI – абонентарин улупбар дюз апIувал, хусусият гьисабназ гъадабгъувал, газ пай апIбан эйси хътру объектар ашкар апIувал ву. Мидланра савайи, совещаниейин иштиракчйири ишлетмиш гъапIу газдихъан гьякъи тувувалин ляхин къайдайиз дубхну ккунивалин чарасузваликанра къайд гъапIнийи.
Совещаниейин кьяляхъ Сергей Меликовди ва газдин компанияйин вакилари журналистарин суалариз жавабар тувнийи. Виталий Маркеловди рес-публика гьаму йисан газдихъди тямин дапIну ккудубкIну ккуниваликан гъапнийи. «Учу гьякъи тувбан саб вуйи документ кьувватнаъ ипбан зиин ляхин гъабхурача. Ич метлеб – инсанари ишлетмиш гъапIу газдихъан пул тувувал вуйич. Гьаддиз харж гъапIу газ гьисаб апIру ва фуну вахтна вушра улупбар хътауз шлу алат лазим ву. Газ ишлетмиш апIру гьарсаб хулаъ думу жюрейин алат хьибди, хъа хал лазим вуйи вари документар айиб дубхьну ккунду. Газдихъди тямин апIбан бадали, хуларихъ эйсивалин документар хъади хьувал чарасуз лазим ву», – гъапну «Газпром межрегионгаз» ООО-йин генеральный директор Сергей Густовди.
Дугъу къайд гъапIганси, программайиъ гьисабназ гъадагъбан бадали, шубуб документ лазим ву: паспортдин копия, хуларин эйсивалин гьякьнаан шагьадатнама, СНИЛС.
Сергей Меликовди Дагъустандиъ 11 район газдихъди тямин дапIну адруваликан кIваин гъапIнийи. Дугъан гафариинди, жилин участокарин ва хуларин документар гьязурди адарш, газдихъди тямин апIбан программайик кучIвуз шулдар. «Ляхин сатIиди дапIну ккунду. Гьарсаб гъулан агьалийихъанди дугъан хуларин гьякьнаан документар лазим вуйиси жарарихьан гьязур апIуз шулдар. Гьарсар эйсийи чан хуларин гьякьнаан документар чав гьязур дапIну ккунду. Хъа ухьу дугъаз шартIар тямин апIурхьа», – гъапну Сергей Меликовди.
