Рособрнадзори цци вузарик урхуз кучIвбан къайдйир дигиш гъапIну: вузариз кьабул апIбан «кьюбпи лепе» хьибдар, олимпиадйирин гъалибчйириз айи льготйир кам хьиди, ЕГЭ-йин натижйир вая вуздин айитI тувру экзаменар ктагъузра мумкинвал гъубзидар.

 

ЦIийи къайдйир гъябгъюрайи йисан 1-пи мартдихъан гьяракатнаъ учIвра ва 2027-пи йисан 1-пи сентябриз кьувватнаъ гъузди. Гьаддин гьякьнаан Рособрнадзорин пресс-гъуллугъну мялум гъапIну.

ВаритIан асас дигиш’валар вуздин айитI гъахру ахтармишарин гьякьнаан ву. Гьамусдиз вуздиз кьабул апIбан бадали, сабнубдин – ЕГЭ-йин вая вуздин айитI кьабул апIру экзамендин – варитIан заан натижйир гьисабназ гъадагъуйи. Хъа гьамус вузариъ ЕГЭ-йин ерина гъахури шлу кIул’инди вуйи ахтармишар гъузидар. Дурар, ЕГЭ-йин натижйирра гьисабназ гъадагъну, хъасин аьлава вуди гъахиди.

Урхуз кучIвруган, ЕГЭ-йин вая вуздин экзаменар ктагъуз мумкинвал анжагъ кадабгънайи вуздин прог-раммайихъди ттархьну гъюру аьгъювалар гъадагъу кьялан пишекарвалин образованиейин гъурулушдин выпускникаризтIан гъубзидар.

Олимпиадйирин гъалибчйириз, конкурсдиъ иштирак дархьиди, бюджетдин бинайиинди вуздик кучIвуз айи льготйирра, программйирин кьадарси, цIиб гъапIну. Муганайиз швнуб-саб программайиан урхуз аьрза тувуз шуйиш, цIийи къайдйириинди анжагъ саб программайиантIан хьибдар.

Вузариз кьабул апIбан асас вахтра цIиб ярхи гъапIну – 3-9-пи августдиз.

Электрондин жюрейиинди, почтайиъди вая очно вуди документар хътауз мумкинвал гъубзди. Гьаму шубуб жюрейиинди документар кьабул апIуз вузар буржлу хьиди.

Вуздик урхуз кучIвуз аьрзйир ва документар кьабул апIру вахтра – 20-пи июндизкьан, ва конкурсдин сиягьар ачухъ апIру вахтра – 27-пи июль – тяйин гъапIну

Жвув вуздиз кьабул апIуз разивал туврайи аьрза 3-пи августдиз хъадапIну ккун хьибди, хъа 9-пи августдиъ вуздиз кьабул апIбан гьякьнаан къарар удубчIвиди.

Улихьганси, гьамусра 5 вуздиз документар тувуз шулу. ВаритIан гизафси урхуз кучIвуз ккуни вуздиз, жвув душну, аттестатдин оригинал тувуб лазим ву.