Вари халкьарин бабан чIаларин Йигъахъди аьлакьалу вуди, Мягьячгъала шагьрин 39-пи лицейдиъ 7-пи классдиъ урхурайидари урус чIалнаан дарсар киврайи ихь ватанагьли Мая Дашдемировайин регьберваликкди бабан чIалназ бахш дапIнайи «Бабан чIал – халкьдин рюгь» кIуру серенжем кIули гъубхну. Дидин асас метлеб – урхурайидар бабан чIалнахъди, дидин тарихнахъди ва гъийин йигъан дидихъди аьлакьалуди арайиз дуфнайи агьвалатнахъди таниш апIуб вуйи.

 

«Табасарандин нурар» газатдиз Мая Дашдемировайи туву мялуматариинди, бабан чIалназ бахш дапIнайи серенжемдиъ мектебдиъ урхурайидариз дюн’яйиъ чIалар дурграйиваликан ва дурар дургбан себебнакан ктибтну.

«Урхурайидарихъди му жюрейин дарс лап аьшкьниинди гьязур гъапIунча. Машгьур, адлу касари бабан чIалнакан гъапи гафар, фикрар баяр-шубари дудургъну, дарснаъ дурар текрар гъапIнийи ва инсандин уьмриъ бабан чIалну дибиснайи йишвкан чпин фикрар ачухъ гъапIнийи. Дидланра савайи, бицIидари бабан чIалнакан вуйи шиърарра гъурхну.

БицIидарихъди гьязур дапIнайи серенжемдиъ бабан чIалназ бахш дапIнайи лингвистикайин жюрбежюр тамширра гъапIунча. БицIидари бабан чIалнакан багъри чIалниинди вуйи проза жюрейиинди бицIи шиърарра гъидикIну», – ктибтнийи мялимди.

Дарпиди гъибтуз шулдар, 39-пи лицейдиъ табасаран миллетдин мялимарина урхурайи баяр-шубари тешкил гъапIу серенжемдиъ цци 90 йисандин юбилей шулайи ихь газатдиканра гъулхнийи.

«Гъи улхбан чIалнан культура артмиш апIурайиб ва уьбхюрайиб газат ву. 2022-пи йис багъри газатдин юбилейин йис ву. 90 йис – му гизаф вуйин, дарш цIиб? Тарих жигьатнаан думу лап цIиб ву, хъа инсандин уьмрихъди тевиш – гизаф. Учу тешкил гъапIу серенжемдиз уч духьнайи бицIидарира газатдихьна вуйи чпин гьюрмат улупнийи ва газат лап аьшкьниинди урхурайиваликан, чпиз кьабул вуйи рубрикйирикан ктибтнийи.

«Табасарандин нурар» газатдин коллектив улубкьурайи юбилейихъди тебрик апIури, дидиз ужудар маракьлу макьалйир дикIуз кьувват, гьевес ккун апIурача», – аьлава гъапIну Мая Дашдемировайи.