Ихь уьлкейиъ 23-пи февраль Ватан уьбхрурин Йигъси къайд апIури, гьятта 100 йис шула. Думу сабпи нубатнаъ Ватандин Аьхю дявдин ва дидхъанмина гъахьи ерли эгьемиятнан женгарин иштиракчйирин, Урусатдин яракьлу кьувватарин ветеранарин, гьамусяаьт чпин эскервалин буржи тамам апIурайидарин, аьхирки, вари халкьдин машквар ву. Ихь халкьдин ислягь уьмур уьбхюри, уьлкейин яракьлу кьувватариъ гъуллугъ апIурайи гьарсар эскер ва командир халис ватанперверар ву.
Ихь миллетдин вакиларра Ватандин улихь чпин ватандаш’валин буржи тамам апIувалихьна гьарган жавабдарвалиинди янашмиш шули гъахьну. Гьадрарикан сар – учвуз гьаму шиклиъ рякъюрайи Табасаран райондин ТинитI гъулан агьали Темирлан Гьясанов ву.
Темирлан Къунагъбегович, 2000-пи йисан Табасаран райондиъ багъри ТинитI гъулан кьялан мектеб ккудубкIну, чан ватандаш’валин буржи тамам апIуз армияйиз гъушну. Армияйин кьяляхъ, 2003-пи йисан, Темирлан контрактдиин къул дизигну, Чечен Республикайиъ айи военный частариз гъуллугъ апIуз гъягъюру. Грозный шагьриъ 42-пи военный бригадайиъ ва 351-пи батальондиъ гъуллугъ апIури, ихь ватанагьлийи, жвуван вазифйирихьна намуслувалиинди ва заан жавабдарвалиинди янашмиш шули, батальондиъ аьхю гьюрмат гъазанмиш апIуру. СацIиб вахтналан думу 2-пи комендантвалин взводдин командирди дерккру. Гьамусяаьт Темирлан Гьясанов Дербент шагьриъ Чечен дявдин ветеранарин Советдин председатель ва 2018-пи йислан мина Дербент шагьрин сечкийин округдин депутат Низами Рамазановдин кюмекчира ву.
«Ватан уьбхювал – гьарсар жигьилин буржи ву. Дюн’яйин фунуб вушра уьлкейиъ варитIан багьалуб инсандин уьмур ву. Ухьу дид’ина хил за апIру вягьшйириз гьаргандиз гучI тувну ккунду. Гъи ихь гьарсаб сюгьбатнаъ, дявйирин вахтнан тарихнакан улхури, думу кIваинди гъибтурхьа – му ихь гьарсарин ва кIулди вари жямяаьтлугъдин буржи ву. Дявйириъ иштирак гъахьи эскрари, ислягьвал ва жигьил насларин гележег бадали, чпин жанар тувну. Мисалназ, ич взвод боевикариз аькси дявдин швнуб-саб операцияйиъ иштирак гъабхьну. Бандитари, гранатометариан, автоматариан йивури, ихь эскрар айи машинариина гьюжум апIуйи… Чечен Республикайиъ гъахьи дявдин гьяракатариъ агъзрариинди эскрариз зийнар гъахьну, гизафдар гъийихну. Гъи Чечен дяви ккудубкIнашра, думуган йивну гъийиху эскрарин абйир-бабарин, багъридарин юкIвариъ сагъ апIуз даршлу зийнар ими.
Гьамусяаьт, улихьна йисарихь лигну, Дагъустандиъ экстремизмдин ва терроризмдин бинайиинди тасиркарвалар апIбан аьгьвалат саб хайлин ужу дубхьна. Ва ухьу фу дапIнура цIийи дяви хьуз гъитну ккундар», – гъапнийи узухъди вуйи сюгьбатнаъ Темирлан Гьясановди.
Гьелбетда, фунуб хъуркьувалра гьавайиди арайиз гъюруб дар, дидин бинайиъ инсандин фидакарвалин зегьмет, заан зигьим, думу чаз ихтибар дапIнайи ляхниъ тясирлуди ишлетмиш апIуз аьгъювал, аьхирки, жвуван Ватандин, халкьдин улихь кIваантIан жавабдарвал гьисс апIувал ади шулу. Ихь ватанагьли Темирлан Гьясановдиз гьадму вари лишнар хас ву. Гъит дугъан уьмур хушбахтлуб ибшри.
