Аьхиримжи йигъари жюрбежюр социалин сетариъ фунуб жюрейинра, саб жизбикьан дюзвал ктру, хабрар чап апIура. Дурар гизафси гъунши уьлкейин аьтрафариин гъягъюрайи гьядисйирихъди аьлакьалудар ву.

 

Хайлин къалп хабрар, саб бинара адарди, ихь республикайин агьалйирира тарагъура. Гьаци, улихьна йигъари «Алибабаич» кIуру телеграм-каналиъ, Донецк ва Луганск халкьдин республикйирин ватандашарин хатIасузвал уьбхбан метлебниинди дина Хив ва Ахвах районарин администрацйирин депутатарин собранйирин вакилар гъягъюз гьязур вуйивал тасдикь апIури, дурарин терефнаан РД-йин Глава Сергей Меликовдихьна тялукь ИлтIикIуб айиваликан хабар тувну.

Улупнайи месэлайин гьякьнаан чан фикрар ачухъ апIуб ккун апIури, учу Хив РС-дин председатель Садикь Исрафиловдихьна илтIикIунча. Дугъу субут апIурайиганси, му кучIлин хабар ву, я райондин терефнаан тялукь кагъазра гьязур гъапIундар.

«Украинайин сяргьятариин али урус халкьдин ихтиярар уьрхбан гьякьнаан Урусатдин Президент Владимир Владимирович Путинди душваъ хусуси метлеб айи дявдин операция мялум апIувал гъи важиблу ву. Учу дугъан къарарихъди разира вуча. Гъи душваъ ихь гьюкуматдин хатIасузвална халкьарин сабвал уьрхбан гьяракатариъ ухькан гьарсариз багьалу инсанар иштирак шула. Гьякьикьат фикриз гъадабгъну, аьлава кюмек лазим гъабхьиш, узу, узуси имбу сагъу кьувватарра, фунуб вахтнара ихь ватанагьлийириз кюмекназ гъягъюз гьязур вуча. Хъа асас вуди зиихъ улупнайи ИлтIикIбакан гъулхиш, му сар шли-вуш жямяаьтлугъдик имбубсан сикинсузвал кипбан метлебниинди ипнайи кучIлин хабар ву. Гъи ухьуз гьарсаб терефнаан улупурайикьан хабрарихъ хъугъувалиъ аьхю къурху а», – гъапну дугъу.

Гьюрматлу ватанагьлийир! Гъи, дугъриданра, читин ва сикинсуз вахтар дуфна. Абйири кIуруганси «сабурлували ва сабвали дагълар дерккру». Гьамусяаьт уьлкейиъ арайиз дуфнайи гъярмягъяришдиз аьхир дуфну, ихь гьарсарин багъри касар сагъ-саламатди чпин дадйирихьна, хизанарихьна хътакрувалик умуд киврухьа! Гъит аьзиз Аллагьди инсаниятдиз рягьим апIри ва уьлке ислягь ибшри!