2-пи мартдиъ РФ-дин Федеральный Собраниейин Федерацияйин Советди гьякимарин банкариъ айи «къанунсуз» дакьатар кьяляхъ тадагъбан гьякьнаан къанун кьабул гъапIну.

 

Аьхиримжи шубуд йисан банкдин счетдиина гъафи пул официально вуди гъюрайи гъазанжартIан артухъ вуди гъабхьиш, ва думу гьапIруб вуш тасдикь апIуз дархьиш, гьамусдихъантина гьюкуматдихьан думу кьяляхъ тадабгъуз шулу.

Му къанунди, апIурайи харжар гъадагъурайи гъазанжарихъди ттархьну гъювалин зиин гюзчивал гъабхбан гъатарик кахьрайи гьюкуматдин гъуллугъчйирин къанундиинди тасдикь дапIну адру хал-йишв, транспорт, багьалу кагъзар, акцйир РФ-дин гъазанждиз илтIикIуз ихтияр тувра.

Сенаторари кьабул дапI-найи гьаму къанундин гьяракатнакк къайд дапIнайи касарин банкдин счетариина гъюрайи пулин дакьатарра ккахьра.

Гьюкуматдин гъуллугъчйири гъадагъурайи гъазанжарин гьякьнаан вуйи мялуматарин гьякьлувал РФ-дин генпрокурори вая дугъан хиликк кайи прокурорари ахтармиш апIиди. Эгер къанун чIур дапIнайивал ашкар гъабхьиш, дурар, тахсиркрарихьан 10 агъзуртIан артухъ къанунсузди дуфнайи пул кьяляхъ бисувал тIалаб апIури, аьрза хьади суддиз илтIикIиди.

Генпрокурорихьан ва дугъан хиликк ккайи прокурорарихьан, тялукь касарин шаклу гъазанжар гъюрайи мяднар тяйин апIбан бадали, банкарихьна, пул туврайи агентарихьна, налогарин Федеральный гъуллугъназ, ва гьацира финансарин цифрйирин активарихъди ляхин апIурайи операторарихьнара илтIикIуз шулу.

Тялукь дигиш’валар «Банкар ва банкарин ляхнин гьякьнаан» ва «Коррупцияйиз аьксивал улупбан гьякьнаан» къанунариъра тIаъди. Дурар официально вуди къанун чап дапIну 10 йигълан кьувватнаъ учIвди.