Улихьна йигъари Мягьячгъалайиъ айи Дагъустандин гьюкуматдин халкьдин мяишатдин университетдиъ (ДГУНХ), республикайин вари муниципалитетарин главйирра иштирак духьну, Дагъустандин аьтрафар артмиш апIбаз бахш дапIнайи региондин конференция гъабхьну. Дидин асас пайнаъ республикайин Глава Сергей Меликовра иштирак гъахьнийи, хъасин конференцияйин ляхин секцйириъ давам гъапIнийи.
«Республикайин тикилишчивалин циркил артмиш апIбан сифте рякъяр» темайиз бахш дапIнайи «гергми столин» заседаниейиъ РД-йин Правительствойин председатель Аьбдулмуслим Аьбдулмуслимовди Дагъустандин экономика артмиш апIбаъ тикилишчивалин циркли уйнамиш апIурайи роликан ктибтнийи.
Аьхиримжи вахтари, хъа асас вуди коронавирусдин тIягъюн себеб вуди, республикайин тикилишчивалин циркил, хайлин читинвалар алахьну, лап кьяляхъ гъивну. Цирклиъ айи читин месэлйир гьял апIбан бадали, федеральный дережайиъди жюрбежюр уьлчмйир кьабул дапIна. Гьадрарин арайиъ кредитариин али процентариз тувуз субсидйир жара апIувал, читин гьялнаъ айи тикилишчивалин объектар аьхирихъна хуз гьюкуматдин терефнаан артухъси дакьатар тувувал ва гьацдар жарадар а.
Гъи ихь улихь дивнайи вазифа – тикилишчивалин цирклиъ айи гьяракатар цIиб артухъ апIури, 2030-пи йисаз ихь республикайиъ асккан гьисабариинди 15 миллион квадратдин метрин хулар тикмиш дапIну ккудукIувал ву. Му вазифа гьял апIбан бадали, ухьу вари аьтрафар гъварчди артмиш дапIну ккунду, – гъапнийи премьер-министри.
Чан улхуб давам апIури, дугъу гъи чарасуз вуди гьял дапIну ккуни месэлйирра къайд гъапIнийи: аварийный гьялнаъ айи хулар ва шагьрариъ къанунсузди диврайи гизаф мертебайин хулар.
Гьамусяаьт региондиъ 2017-пи йисхъан мина аварийный гьялнаъ айидарси гьисаб дапIнайи 70 хулар а, ва гъябгъюрайи йисан республикайин бюджетдиан дакьатар жара дапIну, му месэла гьял апIуз кка. Мидланра гъайри, Республикайин инвестицйирин программайин дахилнаъди 20 миллиард манаттIан артухъ дакьатарихъ 268 тикилишчивалин объектар тикмиш апIуз планламиш дапIна.
Заседаниейин аьхириъ Аь. Аьбдулмуслимовди, дидин иштиракчйирихьна илтIикIну, артухъди налогар уч дапIну ккуинваликан, инвесторар ва субсидйир жалб апIури, муниципалитетар артмиш дапIну ккуниваликан, Каспийск ва Мягьячгъала шагьрар артмиш апIуз артухъди фикир тувбакан ва архитектурайин гьякьнаан республикайин вари шагьрарин чIатан рябкъювал къайдайиъ гъибтувалин гюзчивал гъабхбакан гъапну.
