Улихьна йигъари Хючна гъулаъ дишагьлийирин машквриз бахш дапIнайи серенжемдиъ Табасаран райондин культурайин, спортдин ва туризмдин управлениейин клубарихъди ляхин гъабхру пишекар Изафет Рашидовайиз райондин главайин терефнаан хилихъ хъапIру сяаьтна гьюрматнан грамота тувнийи. Райондин кIулиъ айири Изафет Рашидова, гизаф йисари культурайин цирклин жюрбежюр гъуллугъариъ лихбаз ва жюрбежюр серенжемариъ иштирак хьпаз лигну, му пешкешариинди лишанлу гъапIну.

 

Изафет Мягьямедовна Рашидова (шиклиъ) 1967-пи йисан 3-пи августдиъ Табасаран райондин Ярса гъулаъ бабкан гъахьну. БицIидихъанмина думу мяълийириин юкIв алир вуйи. Гьеле мектебдиъ урхурайи вахтари думу мектебдин художествойин самодеятельност-дин жанлу иштиракчи вуди гъахьну. Райондиъ кIули гъягъру жюрбежюр конкурсариъра дугъу гьаммишан пешкешнан йишвар гъазанмиш апIуйи.

1983-пи йисан Ярс’арин кьялан мектеб ккудубкIну, Изафет Мягьячгъала шагьриъ культпросветучилищейиъ театрин коллективдин руководителин пише гъадабгъру отделениейик урхуз кучIвну. Жигьил пишекри 1986-пи йисан саб бицIи вахтнан арайиъ Ярса гъулан бицIидарин багъдиъ ляхин апIури гъахьну, хъа 1988-пи йисан Табасаран райондин культурайин хулаъ автоклубдин заведующийди лихуз хъюгъну. Дугъу автоклубдихъди жюрбежюр гъулариз ва ятгъариина марччлихънарихьна гъягъюри, хайлин концертар улупну.

Гьамусяаьт Изафет Рашидова Табасаран райондин культурайин, спортдин ва туризмдин управлениейин клубарихъди гъабхру ляхнин пишекар ву. Дугъу райондиъ ва республикайиъ кIули гъягъюрайи гьятта вари фестивалариъ ва культурайин серенжемариъ иштирак’вал апIура. Гьацира Табасаран райондиъ айи халкьдин театрин сягьнайиин диврайи спектаклариъ швнуб-саб роль уйнамиш дапIна, халкьдин аьдатар улупбан сягьнйириъ ва хориъ иштирак шула. Саб вахтна баяр-шубарихъди жюрбежюр кружк-йирра гъахури гъахьну.

Культурайин цирклиъ лихури, му касдин гьамус 34 йис тамам шула. Умудлу вуза, Изафет Рашидовайи гележегдиъра багъри халкьдин культура артмиш апIбак чан лайикьлу пай кивувал давам апIиди.