Республикайин Глава Сергей Меликов уьлкейин меркездиъ РФ-дин Правительствойин председателин заместителар Александр Новакдихъди ва Виктория Абрамченкойихъди гюрюшмиш гъахьну.
Александр Новакдихъди вуйи сюгьбатнаъ ихь республикайиз инвестицйир жалб апIбан ва яшайишдинна экономикайин артмиш’валин месэлйир гъитIирккну.
Гьацира республикайин ТЭК-дин ва ЖКХ-йин тешкилатар дурумлуди артмиш хьпан программа уьмриз кечирмиш ва «Газпром» ПАО-йихъди сатIиди Дагъустандин агьалйирин хулариз газ зигувал жанлу апIбан месэлйириканра гъулхну. Хулариз газар зигувал тамам апIбан программайин дахилнаъди 2025-пи йисаз дидин дережа гьамусяаьт айи 69,2 процентдилан 79,1 процентдиина за хьибди.
Вице-премьери къайд гъапIганси, республикайиъ бикарвал ис апIури, ишлетмиш апIурайи газдихъан пул тувбан дережа за апIувал ва электросетарин циркилна инфраструктура цIийи алаувал лазим ву.
Виктория Абрамченкойихъди гъабхьи гюрюшдиъ С.Меликовди республикайин районар ва гъулар шид улубчIвбахьан уьрхбан ва кафари терефнан мелиорацияйин гъурулуш артмиш апIбан бадали, федеральный гьюкмин тамам апIру органарин терефнаан вуйи серенжемар уьмриз кечирмиш апIбан месэлйирикан сюгьбат гъубхну.
Терек нирин циркил марцц апIбан ляхнар кIули духну ккунивализра асас фикир тувну. Терек – Кафари Кавказдин варитIан аьхю нир ву, хъа думу асккан кIулиъ гизаф цирклариз жара шулайи йишв –Урусатдин Кьибла терефнан гьюлин аьхюбсиб гъирагъдихъишв ву. Думу гьутIубччвиш, агьалйирин хатIасузвал уьбхбан бадали, шид дебккру дараматар тикмиш дапIна. Амма гизаф йишварихь чарсуз гьял арайиз гъювалин хатIа а. Гьаддиз гюрюшдиъ республикайин кIулиъ айири Терек нирин штунна мяишатдин ляхнар уьмриз кечирмиш апIбаъ федеральный центриан кюмек ккун гъапIну.
Душваъ къайд гъапIганси, нирин гьялнакан Аракумский, Нижнетерский штун гъанавар ва Аграханский залив цIийи алаувалра асиллу шула. Гьаддиз гьаму ляхнар кIули гъахували республикайин кафари районарин яшайишдинна экономикайин артмиш’вализ ужуб тясир апIиди, фицики дурарикан мелиорацияйин, балугъчивалин мяишатдин, вари экологияйин гьял асиллу шула.
Виктория Абрамченкойи республикайин Главайин теклифарин тереф гъюбхну.
Дурарин гьякьнаан федеральный гьюкмин тялукь органариз табшуругъар тувди, хъа дурар гьял апIбан план багарихьди вице-премьерин регьберваликкди гъабхуз ккайи координационный совещаниейиъ тартиб апIиди.
