14-пи мартдиъ Табасаран райондин культурайин хулаъ райондин гъуларин культурайин хуларин ва библиотекйирин гъуллугъчйирихъди семинар-совещание кIули гъубшнийи. Думу Табасаран райондин культурайин идарйирин 2021-пи йисандин ляхнин натижйир йивбаз бахш дапIнайи.
КIваин апIуз ккундузузки, 2021-пи йисан Табасаран райондин главайин къарариинди, райондин гъулариъ айи культурайин хулари апIурайи ляхин ва дурар айи гьял ахтармиш апIбан бадали, тялукь комиссия тешкил гъапIнийи. Дидин дахилнаъ Табасаран театрин директор Аьлимурад Аьлимурадов, Табасаран райондин культурайин, спортдин ва туризмдин управлениейин культурайин отделин кIулиъ айи Арсен Асланов, Дагъустан республикайин халкьдин яратмиш’валин хулаъ лихурайи ихь ватанагьли Минажат Мурадова ва жарадар айи. Комиссияйи райондин гьарсаб культурайин хулан ляхнин гьякьнаан жа-жаради справк-йир гьязур гъапIнийи.
Семинар-совещаниейиъ Табасаран райондин культурайин, спортдин ва туризмдин управлениейиз регьбервал туврайи Аьбдулвагьаб Аьбдуловди уч духьнайидар комиссияйин ляхнин натижйирихъди таниш гъапIнийи, ва культурайин идарайин вакилариз дурарин ляхниъ айи нукьсанвалар ашкар дапIну, бицIи вахтнан арайиъ дурар арайиан адагъбан табшуругъ тувнийи.
Комиссияйин справкйириз асас вуди, райондин аьхю гъуларин культурайин хулари (СиртIич, Дарвагъ, Зиль, ТIаттил, Гюгьрягъ, Хюрикк ва гь.ж.) саб жюрейинра ляхин гъабхурадар. Аьбдулвагьаб Аьбдуловди думу идарйирин кIулиъ айидариз, ляхин ва документар кьан дарапIди лазим вуйи дережайиз аькъинай кIури, ижми буйругъ тувнийи.
Ужуди ляхин апIурайи культурайин хуларин цIарнаъ управление-йин кIулиъ айири ТIюрягъ, Пилигъ, Къужник, Кюрягъ, Гуми, Жвулли, ЦIурутIил ва гьацира жара гъуларин идарйир улупнийи.
Совещаниейиъ культурайин, спортдин ва туризмдин управлениейин улубкьнайи йисан вуйи ляхнин планариканра гъулхнийи. Гьаци, АхьитI, ТинитI, Хили-Пенжигь, Улуз гъулариъ цIийи алаънайи культурайин хулар 2023-пи йисан лазим вуйи авадлугъарихъди тямин апIиди. Хючна, Къужник, Хьарагъ гъулариъ айи культурайин хулар лап дибдиан рас апIбанди ву. Райондин библиотекайин идарара цIийиди тикмиш дапIну, гьамусяаьт айтIан рас апIбан ляхнар кIули гъягъюра.
2022-пи йисанра саб хайлин серенжемар кIули гъахиди. 18-пи мартдиъ Мягьячгъала шагьриъ Эбелцан, апрелин вазлиъ – «Хядарихьна алдагъурайи гамар» кIуру, бицIидарин арайиъ гъябгъру конкурс, сентябрин вазлиъ Ургур чвуччвунна сар чуччун гъалайиин «Рубасдин мукьмар» кIуру фольклорин фестиваль кIули гъягъиди.
Мидланра савайи, райондин культурайин идарйир «Табасарандин нурар» газатдин 90 йис хьпаз тялукь вуйи серенжемдиъра иштирак хьиди.
