2022-пи йис Дагъустан Республикайин Глава Сергей Меликовди «Образованиейин Йисси» мялум гъапIнийи. Думу йисаз тялукь вуди Дагъустандин бицIидарин багъариъ, мектебариъ «Тербия туврурин Йис» ва «Мялимдин Йис» ччвурнаккди конкурсар кIули гъягъюра.
Улихьнаси Дагъустандин Огни шагьрин «Орленок» кIуру бицIидарин багъдиъ «Тербия туврурин Йис» ччвур тувнайи конкурс кIули гъубшну.
Конкурсдиъ шагьрин бицIидарин багъариъ яшнакк ккуркьну адру баяр-шубариз аьгъювалар ва тербия туврайи 6 мялим иштирак гъахьну.
Къайд дапIну ккундуки, Дагъустандин Огни шагьриъ айи бицIидарин багъариъ образованиейинна тербияйин, административ, мяишатлугъ ва кадрйирин ляхин лазим вуйи дережайиз дубхьна. Шагьрин бицIидарин багъари ва мектебари гъабхурайи ляхнин анализди улупурайиганси, педагогвалин кадрйири чпин ляхниъ ужудар натижйир гъазанмиш дапIна, бицIидарин инсанвал артмиш апIбаъ ва дурариз тербия тувбаъ, баяр-шубарин урхбанна маракьлувалин гьиссар за ва сагъламвал мюгькам апIбаъ гьякьлу рякъяр дагна. Думу ляхниъ педагогари чпин аьгъюваларин бина бегьемди ишлетмиш апIура. Ва 2022-пи йис образованиейин Йисси мялум апIбахъди аьлакьалу вуди, шагьрин образованиейин управлениейи бицIидариз тербия тувбан дережа за, дурарин абйир-бабарин ихтиярарин культура тешкил апIбаан хайлин ляхин дубхна.
Зиихъ къайд дапIнайи конкурсариъ 1-пи йишв Дагъустандин Огни шагьрин 2-пи нумрайин «Изюминка» бицIидарин багъдин тербиячи мялим Сенает Жавадовайи гъадабгъну, 2-пи йишв шагьрин 3-пи нумрайин «Улыбка» бицидарин багъдин тербиячи мялим, Елена Исакьовайиз тувну, хъа 3-пи йишван сагьибар 1-пи нумрайин «Родничок» бицIидарин багъдин тербиячи мялим Альбина Ширинбегова ва шагьрин 6-пи нумрайин «Орленок» бицIидарин багъдин тербиячи Альбина Матиева гъахьну.
Конкурсдин аьхириъ шагьрин образованиейин управлениейин кIулиъ айи Максим Аьлиханов дидин иштиракчйирихьна илтIикIнийи.
«Гьюрматлу мялимар, ичв улихь аьхю ва жавабдарвалин месэлйир дийигъна. Баяр-шубариз бицIидимиди фициб тербия тувиш, дурар гьаци аьхюра шулу. БицIидар, ихь гележег, тербияламиш апIувал бицIи эгьемиятнан ляхин дар. Мушваъ мялимди чан вари кьувватар, чаз айи мумкинвалар, аьгъювалар ишлетмиш дапIну ккунду. Хъа ихь асас пай мялимар гьаци лихурайидар вуйихь. Гъи дурари, яшнакк ккуркьну адру ихь бицIи ватандашариз аьгъювалар ва тербия тувбан цIийи къайдйир агури, гьарсаб ляхниъ ужудар натижйир улупура. Варидариз мюгькам сагъ’вал, хизандиъ хушбахтвал ва ляхниъ хъуркьувалар хьувал ккун апIураза», – гъапнийи дугъу.
