Дагъустан Республикайин экономикайинна аьтрафарин артмиш’валин министерствойин грантариз вуйи «Ерли жягьтлувалар» проект 2019-пи йисхъан мина уьмриз кечирмиш апIура. Ццира, му проект давам апIбан бадали, министерствойиъ муниципалитетариан аьрзйир кьабул апIуз хъюгъна. Грантарин проектдиъ гьар йисан Табасаран ва Хив районарра иштирак шула.
Цци Табасаран райондиан грантарин конкурсдиъ иштирак хьуз 7 проект гьязур дапIна. Райондин пресс-гъуллугънаан мялум гъапIганси, конкурсдиз гьаму проектар адагъиди: Хючна гъулаъ ерлешмиш дубхьнайи Жигьиларин центрин дараматдин расвалин ляхнар аьхирихъна хпан проект; Бургьанкент гъулан бицIидарин багъдин дарамат дибдиан рас апIувал; Пилигъ гъулан культурайин хал дибдиан рас апIувал; СикIухъ гъулан латар рас апIувал (шиклиъ); ТIаттил гъулан кючйир рас апIувал; райондин библиотекайиъ расвалин ляхнар аьхирихъна хувал; мархь гъубгъиган штар гъягъру архарра ккивну, Урзигъ гъулан кючйир рас апIувал.
Хъа гъубшу йисан «Ерли жягьтлувалар» проектдин грантариз вуйи конкурсдиъ иштирак хьуз туву 4-би проектарра гъалиб гъахьну ва дурар уьмриз кечирмишра гъапIну. Гьадрарикан саб – ццира грантарин конкурсдиъ иштирак хьуз аьрза туврайиб – Жигьиларин центрин дарамат дибдиан рас апIбан проект ву.
Къайд апIуз ккундузузки, Жигьиларин центрин дарамат рас апIбан ляхнар сач грант гъадабгъну ккергъдар ву. Расвалин ляхнар аьхирихъна хпан бадали, центр ццира конкурсдиъ иштирак шула.
Жигьиларин центрин директорин вазифйир тамам апIурайи Юсуф Аьлимягьямедовдин гафариинди, «Ерли жягьтлувалар» проектдин грант гъадабгъбаз лигну, Жигьиларин центрин лап читин гьялнаъ айи дараматдин гъваъ гьюдюхну ва айтIан ляхнар тамам гъапIну.
«Республикайин бюджетдианси, меценатдира 2 миллион манатдин кюмек гъапIунчуз. Думу дакьатар вари ишлетмиш гъапIунча. Гьяракатниинди дапIну ккуни вари ляхнар тамам дапIну ккудукIунча. Ццира «Ерли жягьтлувалар» проектдин грантариз вуйи конкурсдиъ иштирак хьпан асас метлеб – центриз лазим вуйи вари техника масу гъадабгъувал, дарамат ужуб кьувватнан электрикдин симарихъди тямин апIувал, гьяят ккабалгувал, бару гьюдюхювал ва центрин гьяятдиъ жигьилариз волейбол апIру майдан тикмиш апIувал вуйич», – гъапну Юсуф Аьлимягьямедовди.
Дугъу чпиз пулин дакьатарихъди кюмек гъапIу Хючна гъулан агьали Эсед Аьбдуллаевдиз чухсагъул мялум гъапIнийи.
Хъа Хив райондикан кIуруш, сач грантарин конкурсдиъ райондиан 5 проект гъалиб гъахьну. Гьадрарикан уьмриз кечирмиш гъапIдар анжагъ кьюб проект ву (Зилдикк ва Ккугъ гъулариъ бицIидари тамшир апIру майднар тикмиш апIувал). Райондин пресс-гъуллугънаан туврайи мялуматариинди, имбуну 3 проект сач уьмриз кечирмиш апIуз хъуркьундар. Гьаддиз дурар ццийин пландик кирчна. Магьа дурар: Хирижв гъулаъ мини-футболин майдан тикмиш апIувал; Гъвандикк гъулан жямяаьтлугъ уч шлу гимихь йишв ккабалгувал; Кашкент гъулаъ мини-футболин майдан тикмиш апIувал.
