Украинайиъ хусуси метлеб айи дявдин гьяракат гъябгъюри, шубуб гьяфтатIан артухъ ву. Дидин саб бязи натижйир йивуз шулу.

 

 

Гьамусяаьт ихь командованиейин ихтиярнаъ ахьу ВСУ-йин дявдин документариз ва йисирвализ гъадагъу Украинайин яракьлу кьувватарин гъуллугъчйири туву мялуматариз асас вуди, Урусатди хусуси метлеб айи дявдин операция кIули гъабхувалиинди, Украинайи кергъуз планламиш дапIнайи дявдин гьяракатар 5-10 йигъандин улихь гъапIну.

Ихь яракьлу кьувватари сабпи йивбар гъапIу вахтна, Украинайин аьхю пай кьушмар дявдин гьяракат ккебгъуз улупнайи йишварихьна гъягъюз гьязурди ади гъахьну. Гьаддиз ухьу хабарсузди алархьну кIуру жюрейин саб гафра дубхьну ккундар, хъа тактикайин хабарсузвал дурари, гьелбетда, гьисс гъапIну.
Украинайин армия, дявдин вахтнан планариз асас вуди, чан яракь ерлешмиш ва женгнахьна гьязур апIуз хъубкьундар. ВСУ-йин командованиейи СатIи вуйи Штатарин ва Ригъ алабхъру терефнан уьлкйирин политикайин илзигуваликк ккайи Урусатдин улихь-кIулихь хьайидари, ачухъди къурхулувал арайиз дарфикьан гагьди, мицдар дявдин гьяракатар ккергъур кIури, хиял апIури гъахьундар. Дурари, чпин союзникари Урусат гюзчиваликк дибисна ва, фицибкIа хатIа арайиз гъюри гъабхьиш, Киевдиз улихь ккимиди хабар дебккди кIури, фикир апIуради гъахьну.

Мидиз улихьна, Урусатди чан хатIасузвал тямин апIбан гьякьнаан тIалабар дивну, дюзди кьюб вазлин арайиъ Ригъ алабхъру терефнан уьлкйири (Германияйи, Францияйи, Великобританияйи) ва СатIи вуйи Штатари, саб пландиин дийигъну, Урусатдин тIалабар фицикIа гьяспикк ккадраъди, я дурар гьял дарапIри, хъа Украина дявдихьна гьязур апIури, дурариз гьамусдин деврин яракь хъибкIри, улхбар мялум дару вахтназ кьяляхъ апIури гъахьну.

Гьадму йигъари Ригъ алабхъру терефнан уьлкйирин улихь-кIулихь хьайидар гьар гьяфтайиъ сарихъди сар Москвайиз гъюри, чпи йикьрар апIурайидарси улупури, хъа гьадму вахтна Украина дявдихьна гьязур хьпан бадали, вахт гьидирфури гъахьну. Гьаци, ВСУ-йин командованиейи чан кьушум мюгькам дапIну, дурарин кьадар, «тербатар» ва «нацгвардияра» кади, 300 агъзурихьна артухъ гъапIну. Му кьадар сяргьятарихъ хъайи урусатдин кьушмартIан кьюб ражари артухъ вуйи.

Украинайин ригъ гьудубчIвру терефнаъ дурари, Ригъ алабхъру терефнан уьлкйирихьан кюмек вуди чпиз ккубкьу, танкариз йивру цIийи жюрейин яракь хъибкIну, дявдин ва материалинна техникайин сурсатарин чюлин складар яратмиш дапIну, жиниди, аьгъю даршлуси дапIнайи ПВО-йин дакьатар гьатIарццнади гъахьну.

Расди айи авиапаркдин аьхюбсиб пай техника запасдиъ айи аэродромариъ ва жюрбежюр аьхю тикилишарикк жин дапIнади гъахьну. Гьаму вари серенжемари дурариз урусатдин кьушмари яракьсуз апIуз гъиву сабпи йивбариан гъийихдар дархьиди удучIвуз ва дишлади урусатдин кьушмариз аькси женгар ккергъуз мумкинвал тувну.

Вушра, ихь кьушмарин дикъатлу тактикайи, сабпи сяътарилан ккебгъну, америкайин ва британияйин дявдин теклфичйирин кюмекниинди йисариинди гьязур апIури гъабхьи украинайин оборонайин план гъючIюбгъну.

Думу пландиъ мялуматариинди илзигувализра гизаф йишв улупнайи. СатIи вуйи Штатари ва дурарин терефкрари мялуматаринна пропагандайин кьувватниинди урусатдин жямяаьтлугъдин арайиъ наразивалар, гъярхьувалар арайиз хуз ккайи. Дурарин асас метлебра – му дявдин гьяракатнаъ Урусат магълуб хьуз гъитбахъди сабси, ихь уьлкейин айитI политикайин кризис, митингар арайиз духну, олигархарин дестйирин кюмекниинди гьяракатнаъ айи гьюкум дабгъувал, Президент ултIурккувал вуйи.

Урусатдин хусуси метлеб айи дявдин операция – Украинайинна СМИ-йин пландиз ужуб жаваб гъабхьну. ВСУ дявдихьна гьязур шули имиди, ихь кьушмари дурарин вари яракь дагъитмиш апIуз хъюгъну. Сифте вуди душваз диш гъапIу ихь кьушмари, женгариз удудучIвди, стратегияйин важиблу йишвар гъидисну ва украинайин политикайин, экономикайин ва дявдинна стратегияйин асас центрар вуйи Киев, Харьков, Николаев ва Херсон шагьрар му жигьатариан зяиф гъапIну.

Хъасин хьуд йигъандин арайиъ зат хътудутIди гъягъюри гъахьи женгариъ украинайин кьушмариз аьхю зарарар гъахьну, гьаддиз дурар шагьрариъ учIвну, ислягь инсанаригъ жин хьуз хъюгъну.

ВСУ-йин дявдин план тамам шулайи ялгъуз саб район – Донбассдин «Восточный вал» ву. Мушваъ украинайин дестйири сабпи йигъарихъанмина ижми къаршувал улупура.

Гъийин гьялнакан улхуруш, дявдин экспертарин гафариинди, шубуб гьяфтайин арайиъ Украинайин аьхю пай бронетехника ва механизированный частар дагъитмиш дапIна. ВСУ-ра Киевдиъ, Харьковдиъ, Донецкдиъ ва Одессайин багарихь швнуб-саб пайназ жара дубхьна, дурарин арайиъ саб жюрейинра аьлакьа адар ва дурарихьан чиб-чпихьна фукIа хътапIузра шуладар, гьаз гъапиш завуъ ихь кьушмари агъавал апIура.

Мариуполиъ айи миллетчивалин варитIан кIубан кьушмарра зяиф духьна. Ихь кьушмари му шагьур гъибисиган, Киевдиъ къаршувал улупбан мяна гъубзидар, фицики душв’ан удучIву Донбассдин ва РФ-дин яракьлу кьувватари, Николаевдин ва Одессайин терефназди диш духьну, гьюлерин гъирагъар чпин хилиз дисиди. Ригъ алабхъру терефнан уьлкйирихьан гъюру кюмекнакан миж ктабтIу ерли агьалйир, гьадму гьисабнаан жилар, харижи уьлкйириз гьергну гъягъюра, хъа гьамусяаьт айидар бегьемди саб корпус апIузкьана гьуркIрадар. Дурар яракьламиш апIбан месэла хъана учIруди дийибгъна.

Киевди, урусатдин кьушмарикан сикин дарди кучIлин мялуматар тарагъури, дурар дагъитмиш дапIну ккудукIура кIури, халкь яваш апIура. Мариуполь ихь кьушмари дибисну, Донецкдин багахь хьайи ВСУ дагъитмиш гъапIиган, украинайин халкь думу кучIларин гъавриъ хьибди. Хъа дявдин экспертари, думу саб гьяфтайин ляхин ву кIури, гьисаб апIура.