Мартдин 23-пи йигъан ДГПУ-йин идара апIбан ва ихтиярарин факультетдиъ «Ватанпервервалин дарс» кIули гъубшну. Дагъустандин гьюкуматдин педагогвалин университетдин мялимарин ва студентарин иштирак’валиинди тешкил дапIнайи думу серенжемдиз Мягьячгъала шагьрин агьли касарин Советдин председатель Тажудин Бижамовдиз, РД-йин военный комиссариатдин Мягьячгъала шагьриъ жигьилар дявдин гъуллугъназ гьязур ва дих апIбан отделениейин начальник Альберт Рягьимовдиз, «Табасарандин нурар» газатдин кIулин редактор Гюлягьмад Маллялиевдиз теклиф дапIнайи.
Серенжемдиз уч духьнайидарихьна илтIикIну, ДГПУ-йин жигьиларин ляхнариз лигру управлениейин кIулиъ айи Руслан Гереевди, вуздин ректорин терефнаан мани гафар дупну, аргъаж шулайи наслар агьли касарихъди, ветеранарихъди, жюрбежюр цирклариъ ляхин гъапIу ва аьхю тажруба айи касарихъди гюрюшмиш хьувалин важиблуваликан гъапнийи.
«Ватанпервервалин дарснан» дахилнаъди удучIвну гъулху Тажудин Бижамовди уьлкейиз читин вахтна ухьу вари сатIи духьну ккуниваликан гъапнийи.
Дугъу гьацира РД-йин военный комиссариатдин Мягьячгъала шагьриъ жигьилар дявдин гъуллугъназ гьязур ва дих апIбан отделениейин начальник Альберт Рягьимовдиз, гизаф йисари баркаллу зегьмет зигури, заан пишекарвалиинди лихурайивализ ва РД-йин жигьилариз ватанпервервалин тербия тувбак лайикьлу пай кивбаз лигну, гьюрматнан грамота ва Дагъустан Республикайин орден – Жямяаьтлугъдин гьюрматнан лишан тувну.
Чан терефнаан Альберт Рягьимовди чав гъапIу ляхниз заан кьимат тувбаз агьли касарин Советдиз чухсагъул мялум гъапIну. Дугъу гьацира «Ватанпервервалин дарсназ» уч духьнайидариз Урусатди Украинайиъ гъабхурайи хусуси метлеб айи дявдин операцияйиъ Дагъустандиан вуйи эскрари ва офицерари чпин гъуллугънан буржи намуслувалиинди тамам апIурайиваликан ктибтну.
Жигьиларикан дугъу интернетдиъ ва социальный сетариъ айи вахтна дикъатлу фикир апIувал, лазим дару мялуматариз фикир тутрувувал ккун гъапIнийи.
«Табасарандин нурар» газатдин редакцияйин коллективди Альберт Амирялиевич му наградайихъди кIваантIан тебрик апIури, дугъаз жандин сагъ’вал, ляхниъ хъана заан хъуркьувалар гъадагъувал ккун апIура.
Альберт Амирялиевичдихъди ихь уьлкейиъ арайиз дуфнайи аьгьвалатнакан яркьу сюгьбат гъабхбан бадали, дугъаз багарихьди газатдин редакцияйиз хялижв хьуз теклиф дапIнача.
