Дюн’яйиъ саб гьюкуматдихьанра уьлкейиъ къанун ва къайда уьбхру кьувватар адарди гъузуз шулдар. Урусатдин МВД-йин айтIан кьушмарин бинайиинди тешкил дапIнайи Урусатдин Федерацияйин милли гвардияйин кьушмар гьацдар кьувватарикан садар ву. Думу дявдин тешкилатдин вазифа – Урусатдин Федерацияйиъ къанундин къайда уьбхювал, гьюкуматдин ва жямяаьтлугъ хатIасузвал тямин апIувал, инсандин ва ватандашдин ихтиярар ва азадвал уьрхювал ву.

 

Урусатдиъ гьар йисан 27-пи мартдиъ милли гвардияйин кьушмарин йигъ къайд апIури шулу. Урусатдин вари аьтрафариин думу кьушмар аливализ лигну, гьарсаб региондиъ му машкврихъди аьлакьалу серенжемар кIули гъахуру.
Гьаму йисан милли гвардияйин кьушмарин йигъ Урусатди Украинайиъ хусуси метлеб айи дявдин операция гъабхурайи вахтниин алабхъну.

Росгвардияйин кIулиъ айи армияйин генерал Виктор Золотовди къайд гъапIганси, гъи Украинайиъ гъябгъюрайи хусуси метлеб айи операцияйиъ Росгвардияйин кьушмари РФ-дин Яракьлу кьувватарихъди сатIиди чпин улихь дивнайи месэлйир лазим ву-йиси тамам апIура. «Гьелбетда, дявдин хусуси метлеб айи операция ухьуз ккуниганси ухди гъябгъюрадар, миллетчйир ислягь ватандашарин, кьабидарин, дишагьлийирин кьяляхъ жин шула, бицIидарин багъариъ, мектебариъ, инсанар яшамиш шулайи хулариъ дявдин яракьар дерккну, гьадушвариан йивбар апIура», – гъапну армияйин генерали.

Урусатди февралин 24-пи йигъан Украинайиъ дявдин хусуси метлеб айи операция ккебгъну. Уьлкейин Президент Владимир Путинди къайд гъапIганси, дявдин хусуси метлеб айи операция кIули гъабхбан асас метлеб – миржид йисандин арайиъ киев-дин миллетчивалин гьюкмин аьзабнакк ккайи инсанар уьрхювал ва азад апIувал, Донбасдин ислягь агьалйириз аьксиди гъапIу тахсиркарваларихъан жавабдар касар суддин улихь дерккувал ву.
РФ-дин оборонайин ми-нистерствойин улупбариинди, Урусатдин Яракьлу кьувватари, Украинайин дявдин инфраструктура ккидипувал метлеб вуди, йивбар апIура, ислягь ватандашариз зарар туврадар.

Украинайин аьтрафар миллетчивалин гьяракатарихьан азад апIури, Росгвардияйин гъуллугъчйири чпин дирбаш’вал улупура. Дявдин гъуллугънан буржи тамам апIури, жилирвал ва игитвал улупбаз лигну, цIиб улихьнаси РФ-дин Президент Владимир Путиндин Указдиинди Росгвардияйин офицер, полицияйин полковник Денис Степановдиз Жилирвалин орден тувну. Полковникдин хиликк ккайи подразделение душмандин гюллдин йивбарин цIикк ккабхъну. Чаз зиян дубхьнайивализ дилигди, душмандин кьувватар гизаф вушра, офицери чан эскрарихъди дявдин женгар кIули гъухну. Фикирлу гьяракатариинди командири, чан кьушмар миллетчйирин гюллдин цIиккан ккадаъну, зийнар гъахьи эскрар тядиди далу терефназ гъахувал тешкил гъапIну.

Мицисдар дирбаш, чпиз табшурмиш дапIнайи гъуллугъ игитариси тамам апIуз удукьру кьягьялар Росгвардияйин дахилнаъди гизаф а. Гьамусяаьт Украинайиъ кIулиъ гъябгъюрайи хусуси метлеб айи дявдин операцияйиъ Росгвардияйин дахилнаъдиъ ихь ватанагьлийирира намуслувалиинди чпин улихь дивнайи вазифйир тамам апIура. Дурариз варидариз, чпин буржи хъуркьувалиинди тамам дапIну, сагъ-саламатди жвуван ватандиз хъадакну гъювал ккун апIурахьа.

Урусатдин милли гвардияйин кьушмарин йигъ къайд апIбахъди аьлакьалу вуди, учу Урусатдин милли гвардияйин Дагъустан Республикайиъ айи управлениейин начальникдин кюмекчи, полиция-йин полковник Константин Шияндихъди телефондиан сюгьбат гъубхунча.

«Гьаму йисан Урусатдиъ къанундин къайда уьбхру кьушмарин идара арайиз дуфну 211 йис, хъа Росгвардия тешкил дапIну – 6 йис тамам гъабхьну.
Ккудушу йисарин арайиъ ич идарайи, уьлкейин ва милли хатIасузвал уьбхюри, ужуб тажруба гъадабгъну, думу уьмриз кечирмиш апIура. Росгвардияйин РД-йиъ айи идарайи, кьушмарин артмиш’валин месэлйириз лигури, дурарин дявдин гьязурлугвал за апIбиин ляхин гъабхура. Хъа гьаму йисан милли гвардияйин, гьадму гьисабнаъди Росгвардияйин Дагъустандиъ айи военный гъуллугъчйири, хусуси метлеб айи ляхин апIури, чпин пишекарвалин машквар къайд гъапIну.
Росгвардияйин Дагъустан Республикайиъ айи управлениейин кIулиъ айидарин терефнаан вари хусуси составдиз къанундин къайда ва уьлкейин хатIасузвал уьбхбаъ дирбаш’вал, пишекарвалин устадвал улупбаз чухсагъул мялум апIуз ккундузуз.

Гьамусдин деврин Росгвардияйин мюгькам шибритI ккиву, къанундин къайда уьбхру кьушмарин кьувват ва машгьурвал за гъапIу ветеранариз гьюрматнан гафар кIураза. Ичв кюмекниинди кьушмарин Ватандиз вафалувал улупбан дявдин аьдатар мюгькам апIувал давам шула.
Гьамусяаьт, хусуси метлеб айи операция гъабхури, чпин улихь дивнайи дявдин месэл-йир тамам апIурайи эскрарин багахьлуйиризра ич гьюрмат улупуз ккундучуз. Чухсагъул учвуз!» – гъапну Константин Шиянди.