Мартдин 31-пи йигъан Мягьячгъалайиъ Дагъустан Республикайин ургубпи дих апIбан Халкьдин Собраниейин урчIвубпи сессия кIули гъубшну.

 

Сессияйиъ гьял апIбан бадали, 24 месэла адагънайи. Дурарикан варитIан асасуб РД-йин Правительствойин 2021-пи йисандин ляхнин натижйирин гьякьнаан Дагъустандин Глава Сергей Меликовдин удучIвну улхуб вуйи.

Дугъу чан докладдиъ къайд гъапIганси, 2020-пи йисандин улупбарихь тевиган, 2021-пи йисан Дагъустандин яшайишдинна экономикайин артмиш’валин улупбар за шулайивал рябкъюру. «Экономикайин биналу цирклариъ масу тувру шей’ар гьясил апIувал ва гъуллугъар гьуркIувал 4,6% за гъахьну. РД-йин консолидированный бюджетдиз гъафи налогарин ва налогарин дару гъазанжари 9 миллиард манат, ясана 119% тяйин гъапIну.
Сергей Меликовдин гафариинди, промышленостдин гьясиллувал – 5,2% , хъа гъулан мяишатдин сурсат гьясил апIувал – 0,5% за гъахьну.
Тикилишчивалин цирклин улупбар – 2 %, са-сабди алвер апIувал – 1%, пулихъ игьтияжар гьуркIувал – 16,6% за гъахьну.
2021-пи йисан Дагъустандиъ кьялан маважибдин кьадар 6,7% за гъабхьну.

2021-пи йисан Дагъустандиъ промышленностдин гьясиллувал, оборонайин заказар артухъ хьувализ лигну 7,3 миллиард манатдиинди за гъабхьну, гьаддиз думу улупбари, 2020-пи йисандин улупбарихь тевиган, 140% тяйин гъапIну.
«Мягьячгъалайиъ, Буйнагъскдиъ ликариин алахьрудар дирхру фабрик-йир, картондин ишкIар гьясил апIру фабрика ачмиш апIували экономикайин улупбариз тясир гъапIну.

2021-пи йисан гьюкуматдин терефнаан промышленностдин цирклин карханйириз туву кюмекну ужудар натижйирихъна гъахну. ЙицIбариинди карханйириз уьмуми кьадар 50 миллион манатдиинакьан субсидйир тувнийи. Гьюкуматдин терефнаан туву кюмекнан саб пай индустрияйин паркар арайиз хуз ва дурар артмиш апIуз жара гъапIуб вуйи. Гъийин йигъаз ихь республикайиъ 300 гектарин йишв дибиснайи гьацдар 6 парк а. Думу жюре паркарилан гъюрайи гъазанждин кьадар сабна гьацI ражари артухъ гъабхьну (5,5 миллиард манат), туврайи налогар 2,8 ражари артухъ гъахьну ва 600 миллион манатдиинакьан удучIвну»,- гъапну Сергей Меликовди.