Узуз уьмриъ заан хъуркьувалар ва мумкинвалар улупурайи гизаф спорт-сменарикан макьалйир дикIуб кьисмат гъабхьунзуз.
Гьар ражари узу дурарин дирбаш’валиин ва удукьувалариин, чпин улихь дивнайи кьастарихьна мюгькамди гамар алдагъури гъягъюрайивалиин, чIуру гъиллигъарихьан ярхлади гъузри, дурарикан ужудар хизанарин эйсйир ва ватанперес баяр ктучIвурайивалиин инанмиш шулаза. Дурарикан гьич сарра заан дережайин спортсменар дишлади гъахьундар – варидари чпин рякъ бицIи гамарилан, машгьурдар даршра, чпин ляхин бинайиан аьгъю, заан устадвал кайи тренерарихьна гъягъбалан ккебгъну. Амма думу спортсменар машгьурвалихьна, заан пишекарвалин мумкинваларихьна ва гъалибваларихьна бай-вахтнаанмина кIваъ айи аьхю кьастари ва умудари гъахну.
Гъи узуз гъудуркьу машгьур спортсменарикан ваъ, аьксина, дурумлуди гамар диври, думу рякъюз удучIвурайи ихь бицIи ва дирбаш живан Мюгьяммад Аьлимурадовдикан бикIуз ккундузуз. Мюгьяммад Дербент шагьриъ яшамиш шула. Дугъан абйир-бабар Дербент райондин Сегьлюк гъул’ан Дербент шагьриз кючмиш гъахьидар ву. ЦIиб улихьнаси Дербент райондин глава Мавсум Рягьимовди райондин ужударстар хьур спортсменарин дестейиъди чахьна Мюгьяммад Аьлимурадовра кьабул гъапIну ва, спортдиъ гъадагъурайи хъуркьувалариз лигну, думу гьюрматнан грамотайи-инди лишанлу гъапIну.
Спортдин грэпплинг жюрейин кчIихбариин машгъул духьну, Мюгьяммаддин гьеле кьюд йискьан бегьем дубхьнадар. Хъа гьаму муддатнаъ думу 10-12 чемпионатдиъ, турнирариъ ва жара талитариъ иштирак гъахьну ва саки вари кчIихбариъ дугъу заан йи-швар гъадагъну.
Спортдиин Мюгьяммад байвахтнаанмина юкIв алир вуйи. КчIихбарин спортдиз гъяйиз, Дербент шагьриъ футболин «ТЭФФИ» кIуру мектебдиз гъягъюри, думу Дагъустандиъ Кафари Кавказдин республикйириъ живан футболистарин ва тренерарин арайиъ машгьур гъахьну. Дугъан тренер, жигьил спортсмен футболиан олимпиадайин резервдин мектебдиз гьязур апIурайиваликан хабар хьади, Аьлимурадоварин хулаз гъафнийи. Хъа, гьяйифки, футбол уйнамиш апIуз ккуни ва дид’ан заан хъуркьувалар гъадагъуз шлу живанар республикайиъ гизаф ашра, ухьухь спортдин му жюре артмиш апIуз ужудар тренерар ва жара шартIар цIибтIан адар. Гьаддиз Мюгьяммаддин адаш Аьлимурадди тренерикан бализ фикир апIуз сацIиб вахт тувуб ккун гъапIнийи.
Гьарсар касдин уьмрин рякъ ва кьисмат вахтну ккабалгуру кIуруганси, тятIиларин вахтна гьавайиди вахт адапIударза кIури, Мюгьяммад чан дуст баярихъди чпин хуларихьан ярхла дарди ерлешмиш дубхьнайи, живанар грэпплингдиин машгъул духьнайи спортдин зализ гъягъюз хъюгъру. Бай дина саб шубуб ражари гъягъя-йизра, думу тренериз кьабул шулу, ва дугъу живан чан хиликкна гъадагъуру. Мюгьяммаддин спортдихьна вуйи аьшкь рябкъюри, спорт сабпи йишв’ин дивну, думу аьгъювалар гъадагъбаан кьяляхъ гъузур кIури, абйир-бабарик гъалабулугъвалра кабхъну гъабхьну. Амма бали мектебдин дарсариъ вари предметариан заан аьгъювалар гъадагъувализ асас фикир тувра. Гьамусяаьт Мюгьяммадди Дербент шагьрин кадетарин мектеб-корпусдиъ 8-пи классдиъ заан хъуркьувалиинди урхура.
Мюгьяммаддин спортдин цирклиан гъазанмиш дапIнайи медаларин арайиъ, республикайинси, вари Урусатдин, Кьибла Федеральный округдин, вари дюн’яйин талитариъ гъадагъу медаларра а. Улихьнаси грэпплингдиан Анапа шагьриъ кIули гъушу вари дюн’яйин кубок бадали вуйи талитариъ Мюгьямадди шубубпи йишв гъадабгъну.
«Дишди гъапиш, вари дюн’яйин талитариз гъягъюри сабпи раж вуйиз. Йиз тренер Видади Мардановди узу физический ва техника жигьатнаан гьязурди айиваликан гъапнийи. Вушра, сацIиб гъалабулугъвал кайзук. Финалин кчIихбариз узухъди удучIву кас яшнанра сацIиб узутIан аьхюр вуйи. Наан узу гъалатI гъахьнуш, гъавриъ гъахьунза. Дицдар гъалатIар сарун деетударза. ЖвувтIан артухъ гъагъ ва кчIихбар гъахбаан ужуб тажруба айидарихъди кчIихуз ккундузуз. Думу кчIихбари узузра ужуб тажруба тувру. Гележегдиъ гьарган сарпир хьуз кьаст айиз. Грэпплингдин талитариъ ихь багъри Табасарандин пайдагъ гьарган сабпиб хьувал – йиз кIваъ айи хиял вуйиз», – гъапну ич сюгьбатнаъ Мюгьяммадди.
Дугъан бицIину чве Адамра спортдиин машгъул духьна. Дугъу улихьнаси грэпплигдиан кIули гъубшу Кьибла Дагъустандин чемпионатдиъ кьюбпи йишв гъазанмиш гъапIну. Хъа дурарин чи Мира сифте гимнастикайиз гъягъюри гъахьну, хъа гьамусяаьт Дагъустандиъ ва багахь регионариъ машгьур дубхьнайи хореографияйин «Гюнеш» ансамблин асас дестейиз гъадагъна. Мидланра гъайри, Мира шиклар зигбаанра бажаранвал кайир ву.
Гъит гележегдиъ Аьлимурадоварин хизандин бицIидарин вари умудар чпиз ккуниганси кIулиз удучIври.
