ТинтIарин кьялан мектебдиъ мялимди лихури гъахьи Гюльпери Уружева ляхниъ заан хъуркьувалар, жямяаьтдин арайиъ аьхю гьюрмат гъазанмиш дапIнайи адлу пишейин эйсйирикан сар ву.
Гюльпери Уружевна 1947-пи йисан 14-пи майдиъ Ружвникк гъулаъ Уруж Мягьямедовдин хизандиъ бабкан гъахьну. Дугъан адаш финнарихъди вуйи дявдин, иштиракчи ву. Уруж Мягьямедов дявдиан гъулаз дуфну саб вазлилан Ватандин Аьхю дяви ккебгънийи, ва думу кьюбпи дявдиъ аэропланариз йивру тупчиди гъахьну.
Гюльперийин яш 6 йис гъабхьиган, дугъан адаш кечмиш шулу, ва шуран дада хьур бицIирихъди ялгъузди гъузру. Дишагьлийиз гизаф читинвалар гъяркъну, дугъан кьюр бицIир, кетIерццну, кечмиш гъахьну.
Гюльпери Уружевна 1954-пи йисан Ружвниккарин ккергъбан метебдиз гъягъюру. 5-8-пи классар дугъу ТинтIарин кьялан мектебдиъ гъурхну. Мектеб ккудубкIбалан кьяляхъ, думу Дербентдин педучилищейик урхуз кучIвру. 1967-пи йисан урхуб ккудубкIну, Гюльпери Уружева ТинтIарин мектебдиъ ккергъбан классарин мялимди лихуз хъюгъру. Юкьубпи курснаъ урхурайиган, думу гъулаъ маларин духтирди лихурайи бализ швуваз гъягъюру, ва жигьилари чпин хал-хизан ккебгъру.
Мялимвалин ляхниъ алахьурайи читинвалариз дилигди, Гюльпери Уружевайи чан вазифйир баркаллуди тамам апIури гъахьну. Дугъу дарсар киву баяр-шубар гьамусяаьт Урусатдин ва Дагъустандин хайлин шагьрариъ жюрбежюр гъуллугъариъ лихура.
«1967-пи йислан мина 2019-пи йисазкьан 52-йисандин арайиъ мялимвалин ляхин гъапIунза. Мялимди лихурайи вахтна гизаф читинваларра алахьунзуз. Думуган бицIидарин багъар адайи – веледар шинтак китIну, мектебдиз дарсар кивуз гъягъюйза. Узуз гъюрайи маважибдин гьацI туври, бицIидариз лигрур гъагнийза. Гьамус ляхнариз гъягъюз рягьятвалар а. Гьарсаб гъулаъ бицIидарин багъар арццна, мектебдиз гъягъюз автобусар жара дапIна. Ич заманайиъ мицдар гъулайвалар адайи. 1966-пи йисан эвленмиш гъахьунза, ургур велед азуз – хьур бай ва кьюр риш. Дурари варидари чпин хизанар ккергъну, вари ккуни ляхнарин кеспагьлийир духьна. 19 худул ва 5 гудул айиз. 2019-пи йисан йиз яш 72 йис гъабхьиган, аьрза тувну ляхниан удучIвунза, ва гьамус хулаъ рягьятвал гъадабгъураза, йиз баяр-худлариз узхьан шлу кюмек апIури, дуланмиш шулаза», – ктибтнийи Гюльпери Уружевайи.
Гъуландари му дишагьлийиз аьхю гьюрматниинди Гюльпери мялим кIури шулу, гьаз гъапиш гъулан агьалйирин аьхюбсиб пай дугъу дарсар кивдар, дугъахь гъурхдар ву. Гюльпери мялимди учв лихуз хъюгъиган чахь урхури гъахьидарин худлариз ва гудлариз дарсар кивну. Багъри гъулан мектебдиъ чахъди лихури гъахьи мялимариканра саб хайлиндар дугъахь аьгъювалар гъадагъдар ву.
ХьуцIурна кьюд йисан мялимвалин вазифйир кIули гъахувал – пучIу ляхин дар. Гюльпери Уружевайи чан хиликк гъурху варжариинди баяр-шубарин уьмрин мюгькам бина ккивуз кюмек тувну ва дурар гележегдин аьхю уьмрин гьякьлу рякъюхьна гьязур гъапIну.
Гъюзимбу уьмриъра увуз мюгькам сагъ’вал ва хизандиъ хушбахтвал ишри, гьюрматлу Гюльпери мялим.
