Дербент кIваин гъапIган, сабпи нубатнаан, девлетлу тарих, миллетарин ва динарин жюрбежюрвал, зегьметкеш`вал ва ариш-веришчивал, халачйирин ва ипIру-убхъру сурсатарин базрар, гъадми цалар ва мани гьюл фикриз гъюру. Му шагьрин берекетлувал къайд апIури, ихь халкьди, Дербент Пайгъамбрин (с.аь.в.) гъюдрач ктIубччву йишв ву, кIури шулу.

 

Аьхиримжи йисари шагьур гьаци гьялакди дигиш шули ва балгури аки, мушваъ берекет артухъ шулайивал дярябкъди гъубзуз мумкин дар. Шагьриъ кючйир, тарихи хатI уьбхюри, цIийи алаура, гизаф мертебйир айи хулариин гъваар иливура, лифтар гьюдюхюра, икрариъ бицIидариз тамшир апIру йишвар ккабалгура, мектебар рас апIура ва дурарихъ спортдиин машгъул хьуз вари шартIар айи майднар дюзелмиш апIура, туристар гъюбахъди аьлакьалу дараматар тикмиш, саб йишваъра адрусдар пляжар, паркар, фонтанар ачмиш апIура…

Гьаму аьгьвалатнаъ Дербент шагьри республикайин муниципалитетарин арайиъ аргъаж’вализ ва инвестицйириз ужудар шартIар тикмиш апIбан рейтингдиъ сабпи йишв гъибисну кIуру хабар мюгьтал апIруб дар. Му йишв бисбан гьякьнаан 6-пи апрелиъ Дагъустан Республикайин экономикайин ва аьтрафарин артмиш’валин министерствойиъ къарар адабгъну ва Дербентдин администрация дипломдиинди лишанлу гъапIну. Къарар, гъубшу йисан гъапIу ляхнин натижйириз лигну, адабгънайиб ву. Шагьрарин арайиъ кьюбпи йишв Хасавюртдиз, хъа шубубпи йишв – Каспийскдиз тувну.