Апрелин 12-пи йигъан Дербент райондин глава Мавсум Рягьимовди Украинайиъ гъабхурайи хусуси метлеб айи дявдин операцияйиъ чпин гъуллугънан буржи тамам апIури гъийиху эскрарин абйир-бабарихъди гюрюш кIули гъубхну. Дурар чан кабинетдиъ кьабул дапIну, Мавсум Рягьимовди гъийиху эскрарин багахьлуйириз чан, Дагъустан Республикайин Главайин, РД-йин правительствойин ва Дербент райондин агьалйирин терефнаан башсагълугъвал ккун гъапIнийи.
«Малик Гьяжиевди ва Кемран Мурадовди, гьякьлу, дирбаш эскрариси, Ватандин улихь чпин гирами буржи аьхиризкьан тамам апIури, дявдин хатIалу женгарихьан гучI гъапIундар. Урусатди Украинайиъ, Донецкдин ва Луганскдин халкьдин респуб-ликйириъ миллетчивализ ва фашизмдиз аьксиди гъабхурайи хусуси метлеб айи операцияйиъ, ихь уьлкейин ислягьвал ва хатIасузвал бадали, дурари чпин уьмрар тувну. Гъи учвухъди сабси учура дерд зигурача, сабур апIинай», – гъапну райондин кIулиъ айири, кьягьяларин абйир-бабарихьинди илтIикIну.
Пашман улхбарин кьяляхъ Мавсум Рягьимовди гюрюшдиз дуфнайи гъийиху эскрарин абйир-бабарин хилиз дурарин баяр лайикь гъайихь орденар тувнийи.
Дявдин гъуллугънан буржи тамам апIурайи вахтна дирбаш’вал, игитвал улупбаз лигну, Урусатдин Федерацияйин Президент Владимир Путиндин Указдиинди Рубас гъулан агьали, аьхюну сержант Малик Гьяжиибрагьимович Гьяжиевдиз ва Зидьян-Казмаляр гъулан агьали Кемран Бахтиярович Мурадовдиз йикIбан кьяляхъ Кьягьялвалин орденар тувну.
Къайд апIувал лазим вуки, Дербент райондин глава Мавсум Рягьимовди гъийиху эскрарин хизанариз 5 агъзур квадратдин метр жилин участок жара апIбан гьякьнаан ерли администрацияйин жиларин ва хусусиятнан аьлакьйирин управлениейиз табшуругъ тувна.
