Апрелин 11-пи йигъан Дагъустандин Огни шагьрин администрацияйиъ Урусатди Украинайиъ гъабхурайи хусуси метлеб айи дявдин операцияйиъ чан ватандаш’валин буржи тамам апIури гъакIи, отделениейин командир Гьяжимурад Фарзялиевдиз йикIбан кьяляхъ Кьягьялвалин орден тувбан серенжем кIули гъубшну. Орден Гьяжимураддин хпир Мильянат Фарзялиевайихьна ва дурарин бай Фарзялийихьна тувну.

 

Старшина Гьяжимурад Фарзялиев 2022-пи йисан мартдин 3-пи йигъан гъакIну.

Пашман серенжемдиъ Дагъустандин Огни шагьрин кIулиъ айи Жалалудин Аьлирзаев удучIвну гъулхнийи. «Гъийиху игитарин гьюрмат уьбхюри, дурарин багахьлуйириз кIваантIан чухсагъул мялум апIурхьа. Жара инсанарин саламат уьмур бадали, дурари чпиз айи варитIан багьалу уьмур тувувал ухьу кIваълан гьархну ккундар. Игит йикIбалан кьяляхъ, дугъаз орден тувувал гизаф пашман ляхин ву. Инсанди чан гъуллугънан буржи тамам апIури улупу дирбаш’вал дявдин гъуллугънаъ имбудариз лайикьлу чешне ву», – гъапнийи шагьрин главайи.

Гьяжимурад Фарзялиевдин 42 йис вуйи. Дугъу Ростовдин областдин Персиановск гъулаъ дявдин частнаъ гъуллугъ апIури гъахьну. Дирбаш эскрин хулаъ хпир ва юкьур велед гъузну.