Гъябгъюрайи йисан 12-пи апрелиъ Хив райондин Зилдикк гъул’ан вуйи машгьур имам Аьбдусемед Нюдюрмягьямедов 87 йисаъ ади кечмиш гъахьну. Думу неинки Хив райондиъ, хъа гьацира вари республикайин динагьлийирин арайиъ аьхю гьюрмат айи кас вуйи.

 

ГьацI аьсиртIан артухъ вахтна имамвал апIури, аьхю шулайи наслиз насигьятар туври, ужубна харжиб жара апIуз улупури, жвуван ирснахьна, тарихнахьна заан гьюрматлувалиинди янашмиш хьувал тIалаб апIури, хъа гьацира мусурман диндин гьякьнаан аьгъювалар тарагъури, ибадатвал апIури, баркаллу уьмур хъапIбиинди, Аьбдусемед Нюдюрмягьямедовди вари республикайиъ аьхю гьюрмат гъазанмиш гъапIну.

Аьбдусемед Нюдюрмягьямедовди гьацира мусурман диндикан шиърарра дикIури ва дурар жюрбюжюр серенжемариъ аьхю устадвалиинди урхури гъахьну. Тюрк, фарс, аьраб ва азербайжан чIалар аьгъю имамди, табасаранарин тарихнакан, зигьимлу ва гьякьлу уьмур хъапIу ихь ватанагьлийирикан ихтилатар ктитури, дурар аьхю шулайи наслихьна гирами гьякларси рукьури гъахьну. Мидланра савайи, аьхю бажаранвал кайи имамди Тюркистандин Сулеймандин «Мягьямад Пайгъамбар (с.аь.в.) дюн’яйилан аьхиратдиз гъягъюваликан» дибикIнайи риваят табасаран чIалназ таржума гъапIну.

Аьбдусемед Нюдюрмягьямедовдин уьмрикан яркьуди ктибтурайи макьала газатдин гъюру нумрйирикан сабдиъ чап апIидича.

«Табасарандин нурар» газатдин коллективди, му баркаллу уьмур хъапIу кас кечмиш хьувалин гьяйифвал зигури, Аьбдусемед Нюдюрмягьямедовдин багахьлуйириз башсагълугъвал ккун апIура.