Урусатдиъ хулар дивру участокдихъна пулсузди газ зигбан гьякьнаан прог-рамма гьяракатнаъ а. Дидиз «яшайишдин догазификация» ччвур тувна. Гьаму прог-раммайин гьякьнаан саб бязи гъаврикк ккаъбар туврача.
Газдин турбйир пулсузди, яна гьюкуматдин пулихъ, анжагъ хулар дивру участокдихъна зигуру. Хъа жвуван хуларин айитI газдин турбйир дурарин эйсийи чан пулихъ дизигну ккунду. Гьадму гьисабнаан, газ зигбан проект тартиб дапIну ва тялукь идарйириъ разивал гъадабгъну, газдин турбйир дизигну, хулариз манишин тувру газдин пич дивну, харж шулайи газ гьисаб апIру счетчик кибтIну ва гь.ж. ляхнар тамам дапIну ккунду.
Къайд апIуб лазим вуки, гьюкуматдин терефнаан вуйи ляхнар тамам апIбан бадали, хуларин эйсивал тяйин апIру документар гьязурди ади ккунду.
13-пи мартдиъ Дагъустандин Глава Сергей Меликов «Газпром межрегионгаз» ООО-йин генеральный директор Сергей Густовдихъди гюрюшмиш гъахьну ва Дагъустандиъ яшайишдин догазификация программа уьмриз кечирмиш апIбан гьякьнаан сюгьбатар гъурхну.
Сергей Густовди гаф тувганси, му программа гъябгъюрайи йисан аьхириз бегьемди тамам апIиди ва аьрза туву абонентарин вари участкйирихъна газ зигиди.
Сергей Меликовди думу ляхнар кIули гъахуз гъулай вуйи хьадукранна хьадан вахтна программайин дахилнаъди ляхин шлубкьан жанлу дапIну ккуниваликан гъапну. Дугъу къайд гъапIганси, республикайиъ агьалйирин жюрбежюр гъатариз – Ватандин Аьхю дявдин ва зегьметнан ветеранариз, инвалидариз, касибвал кайи хизанариз яшайиш жигьатнаан кюмек тувбан бадали, тялукь уьлчмйир кьабул дапIна. Дурариз газ ишлетмиш апIру авадлугъар масу гъадагъуз ва хулан айитI газ зигуз гьаруриз 90 агъзурихьна пул тувбанди ву.
Къайд дапIну ккундуки, гьаму программайин тасдикь дапIнайи план-графикдик 2147 абонент ка, дурарикан 1 871 касдин аьрзйир кьабул, хъа 120-рин – тамам дапIна.
Гюрюшдиъ гьацира 2021-2025-пи йисари Дагъустандиъ газар зигувал ва газдихъди тямин апIувал артмиш апIбан программа уьмриз кечирмиш апIуваликанра гъулхнийи. Му прог-раммайиз жара дапIнайи инвестицйирин уьмуми кьадар 13,1 млрд манат ву.
Гьелбетда, «яшайишдин догазификация» программа уьмриз кечирмиш апIувал хусуси хулар тикмиш апIурайидариз аьхю кюмек ву, фицики мидиз улихьна хуларихъна газ зигувалин харжарра эйсийи чав гъахурайи.
