Хив райондин культурайинна эрг’вал йивбан центриъ 29-пи апрелиъ «Учу дуствалиинди кьувватлу вуча» лишниккди бицIидарин багъарин баяр-шубарин ва мектебариъ урхурайидарин арайиъ фестиваль кIули гъубшну. Серенжем Хив РОО-йин жягьтлувалиинди тешкил гъапIуб ву.

 

– Хив райондиъ чпин арайиъ мюгькам дуствал, гьюрмат ади табасаран ва лезги миллетдин вакилар аьсрариинди сатIиди яшамиш шула. Ухьу сабвалиинди мюгькам хизан тешкил апIурахьа. Хъа дуствал ва сабвал уьбхбаъ сар-сарин милли аьдатар, меденият аьгъювали аьхю роль уйнамиш апIура. Кьюб миллетдин вакилари райондин сатIи вуйи тарих, гьякьикьат ва гележег ккабалгнайивализ аьхю кьувват, дерин мяна а. Гьадму ихь гьарсарин хъуркьувалра ву.

Гъийин, вари терефариан харижи меденият гъизгъин шулайи вахтна, ихь милли аьдатар уьрхбазра, дурар артмиш апIбазра дерин мяна а. Гъийин фестивалин метлебра гьадму ву,

– гъапну, серенжем ачмиш апIури, РОО-йин начальник Казбек Къазиевди.

Фестиваль жюрбежюр номинацйириан кIули гъубшну. Гьаци, «ВаритIан ужуб милли мяъли» номинацияйиъ Ургъ’арин кьялан мектебдиъ урхурайи Диана Гъафарова, «ВаритIан ужуб милли ялхъван» номинацияйиъ Гъвандккарин СОШ-дин десте, «Дагъустан халкьарин милли фольклор» номинацияйиъ ЧIилхъарин СОШ-дин десте гъалиб гъахьну. БицIидарин багъарин дестйирин арайиъ Хиварин «Ригъ» ва «Ромашка» бахчйирин дестйири заан бажаранвал улупну. Гъалибчйир РОО-йин терефнаан Гьюрматнан грамотйириинди ва кьиматлу пешкешариинди лишанлу гъапIну.

Хив райондиъ мицдар серенжемар кIули гъапурайивали, душваъ яшамиш шулайи агьалйирин дуствалин аьлакьйир хъана гужал апIура. Дурар, дугъриданра, саб хизандин вакилариз илтIикIура.