Апрелин 27-пи йигъан Мытищи шагьриъ Урусатдин лайикьлу тренер Р.Р.Садикьовдин гьюрматназ спортдин самбо жюрейиан вари халкьарин турнир кIули гъубшну.

 

Душваъ иштирак гъахьи табасаран спортсменар Эмран Исрафиловди ва Мягьяммад Халибеговди гъалибвалин йишвар гъадагъну.

Ич сюгьбатнаъ Эмран Исрафиловди къайд гъапIганси, му турнириъ думу Казахстандиан, Киргизияйиан ва Азербайжандиан вуйи спортсменарихъди талитназ удучIвну. Дугъаз варитIан гъагъидар финалин кчIихбар гъахьнийи. Вушра, чан вари кьувватар, уч дапIну, дугъу азербайжан спортсмендиин гъалибвал гъадабгъну.

Эмранди чахъди сатIиди талитариъ иштирак гъахьи ихь спортсмен Мягьямvад Халибеговдиканра аьхю аьшкьниинди ктибтнийи. Дурар кьюридра гъалибвалин кубокарихъди, медаларихъди, пулин пешкешарихъди ва вари халкьарин дережайин спортдин мастер кIуру ччвур тувбиинди лишанлу гъапIну.
Къайд апIуз ккундучузки, гьаму жигьиларилан гъайри, апрель вазлин аьхириъ кьюрсана табасаран баяри спортдиъ заан хъуркьувалар улупну. Дурар Валид Рашидов ва Расим Аьдилов ву.

Валид Рашидов «Тат Файт» пишекарвалин кчIихбарин лигайин турнириъ Китайдиан вуйи спортсмендиин гъалиб гъахьну. Хъа Расим Аьдиловди спортдин панкратион жюрейин кчIихбариан Урусатдин чемпионвалин ччвур гъазанмиш гъапIну.

«Табасарандин нурар» газатдин коллективди, ихь спортсменар хъуркьуваларихъди тебрик апIури, дурариз гележегдиъ пишекарвалин аьхю спортдиъ заан ва варитIан асас гъалибваларин ва пешкешарин сагьибар хьувал ккун апIура.