Гьюрматлу ватанагьлийир!

Майдин 16-пи йигъан лисхъан сяаьт 2-диъ Мягьячгъала шагьриъ «Урусат – йиз тарих» тарихдин паркдиъ табасаран чIалниинди диктант бикIувалин серенжем кIули гъябгъиди.

Серенжем республикайин «Табасарандин нурар» газатдин тешкиллувалиинди ва ДГУ-йин бабан чIалар аьгъю апIбан Центрин, Табасаран ва Хив районарин администрац-йирин кюмекниинди кIули гъабхиди.

Му серенжем гъабхбан метлеб – бабан чIалнан читин месэлйирихьна табасаранарин фикир жалб апIувал, бабан чIалниинди урхуз ва бикIуз аьгъю апIувалихьна дурарин ккунивал артухъ хьуз гъитувал ву.

Диктант табасаран литературайин бина ккиву кас, шаир, писатель ва драматург, таржумачи Абумуслим Жяфаров бабкан гъахьихъан мина 110 йис тамам хьпан юбилей къайд апIбахъди аьлакьалу серенжемарин дахилнаъди гъабхурайиб ву. Диктантдин текстра дугъан эсериан вуйи саб пайнакан хьибди.

Му серенжемдин дахилнаъди табасаран художникар вуйи Аьбдурягьман Уьсмановдин, Мягьямед Мурадовдин, Избат Уружевайин, Шагьнабат Аьлимурадовайин ва жарадарин гъизигу шикларин выставкара планламиш дапIна.

Гьацира табасаран литературайин цIийи китабарин ва табасаран чIалнан урхбанна методикайин пособйирин выставкара кIули гъябгъиди. Хъа Табасаран драмайин театрин артистари темайиз бахш дапIнайи сягьна улупиди.

Республикайиъ яшамиш шулайи вари ватанагьлийириз табасаран чIалниинди вуйи Тотальный сабпи диктантдиъ иштирак хьуз теклиф апIурача.

«Табасарандин нурар» газатдин редакция