Апрелин 27-пи йигъан Табасаран райондин Цухтигъ гъулан мектебдиъ му гъул`ан вуйи бажаранлу шаир Абумуслим Аьгьмедов бабкан гъахьи йигъхъан мина 70 йис хьпаз бахш дапIнайи серенжем кIули гъубшну.
Мяракайиъ, мектебдин коллективси, му гъулан агьалйир, Табасаран райондин образованиейин отделин начальник Аьбдусалам Гьясанов, Кизлар, Мягьячгъала, Дербент шагьрариъ ва Табасаран райондиъ яшамиш шулайи ихь писателар, шаирар, «Табасарандин нурар» газатдин кIулин редактор Гюлягьмад Маллялиев, табасаран чIалниинди чапдиан удубчIвурайи «Ппази» журналин редактор Феруза Султанова иштирак гъахьну.
Мектебдин коллективдина табасаран писателарин секцияйи му йигъаз гьязур гъапIу программа заан дережайиъди кIули гъубшну.
Мярака абццри, табасаран писателарин секцияйин кIули айи Сувайнат Кюребеговайи шаирин творчествойикан уч духьнайидариз ктибтну, хъа райондин администрацияйин терефнаан серенжемдиъ иштирак гъахьи Аьбдусалам Аьбдулгьямидовичди чан улхбаъ му бажаранлу шаирин эсерар ахтармиш дапIну ккуниваликан, дугъу гъибтнайи ирс дюбхну ккуниваликан къайд гъапIну.
Мяракайиз гьязур духьнайи баяр-шубари уч духьнайидар шаирин биографияйикан вуйи мялуматарихъди таниш гъапIну ва устадвалиинди шиърар гъурхну. Гьацира, му йигъандин программайиъ жанлуди иштирак шули, баяр-шубари ихь халкьдин ялхъвнар, мяълийир гъапIну.
Абумуслим Аьгьмедовдихъди ужуди таниш вуди гъахьи шаир Пирмягьямед Аслановди гьмци гъапну: «Му Цухтигъ гъул`ан саризра ухшар дару, чан хусуси хатI айи шаир удучIвбак гъулан жямяаьтдира чан пай кивну. Шаирин «гъизилин тикйирсдар» 2 китаб гъузна. КIвак гъалабулугъвал кайи вахтна узу Абумуслимдин шиърар урхури шулза, ва йиз кIваз рягьят шулиз. Дугъан китабар учвура урхай. Ухьу ихь шаир кIваинди гъитдихьа».
Табасаран халкьдин писатель Шагьвелед Шагьмар-дановди учв гьаргандиз жигьилди гъузу шаирихъди 1965-пи йисан таниш гъахьи вахтнакан, дугъахъди сатIиди гьау йигъарикан ктибтну.
Му йигъан гьацира Рустам Къурбановди, Аьб-дулмежид Къурбановди, Гюльбика Уьмаровайи шаириз бахш дапIнайи шиърар гъурхну. Гьацира Аьбдуллагь Аьбдурягьмановди, Шюшеханум Керимовайи, Гьюсейн Аьбдурягьмановди, Феруза Султановайи Абумуслим Аьгьмедовдин эсерар гъурхну ва шаирин творчествойиз заан кьимат тувну.
Шаирихъди сатIиди мектебдиъ лихури гъахьи гъарашугъарира му йигъан Абумуслим Аьгьмедовдин кIван марцциваликан, ватанпервервалин гьиссарикан, шаири чан мялимвалин пишейихъ юкIв хъади ляхин кIули гъабхури гъахьиваликан гъапну.
Му серенжемдиъ Абумуслим Аьгьмедовдин бай Арзиман ва риш Индира, дурарин баяр-шубар иштирак гъахьну. Гьамусяаьт Арзимандин Абумуслим кIуру аьхю байра а. Индирайи улихь йисари шиърар дикIури гъахьну. 2007-пи йисан Дагъустандин китабарин чапханайиъ Шамил Къазиевди гьязур дапIну чапдиан удубчIву «Дурнайин мяъли» кIуру китабдиъ му шуран 5 шиир чап дапIна.
Чан адашдин 50 йис тамам гъабхьи вахтназ бахш вуди гъибикIу шиърик Индирайин гьамцдар гафар ка:
«ХьуцIур йис ву,
КIур, уьмриъ вахт авадан…
Гъудужвну, гъач,
Салам тув яв дустариз.
Саб гафкьан йип
Улихь дийигъну шуран –
Увкан ккуниб
Жараб сарун адариз.
Индира Аьгьмедовайин шиърариз фикир туври, Шамил Къазиевди гьамци кIура: «Шаирин шуран шиърар гъурхган, аьгъю гъабхьизуз, Индирайиз чан адашдин марцци, дугъри кIвакан пай гъурубкьну. Гъийин дараскьал уьмриъ шураз дугъан ляхин давам апIуз, чан фикрар, гьиссар поэзияйиъ ачухъ апIуз мумкинвал тувнийиш, саб шакра адарди, Индирайин ччвур поэзияйиин юкIв алидарин арайиъ машгьур шуйи».
Гьяйифки, гьамусяаьт Индирайи шиърар дикIури адар. Мумкин ву, чан адашдиз бахш дапIнайи серенжемдин къяляхъ, дугъан кIван гьиссар хъана ихь табасаран поэзияйиъ учIвур.
Серенжем кIули гъабхбаъ гизаф зегьмет гъизигу мялим-тешкилатчи Гюльмира Фейзиевайи му йигъан дидиъ иштирак гъахьидариз варидариз чухсагъул мялум гъапIну, му мектебдин 9-пи классдиъ урхурайи Заким Сеферовдира шиърар дикIурайиваликан гъапну ва дугъаз гаф тувну. Закимди чав гъибикIу «Йиз Ватан» кIуру шиир аьхю аьшкьниинди гъурхну. Дупну ккундуки, му шиир уч духьнайидариз кьабул гъабхьну.
Серенжемдин аьхириъ мектебдин директор Салман Фейзуллаевди ва поселениейин советдин глава Мягьямедриза Аьбдуризаевди му серенжемдиъ иштирак гъахьидариз чухсагъул мялум гъапIну.
«Мицдар мяракйир гьар вахтна шулайидар дар. Учу ич мектебдиъ му серенжем кIули гъябгъюрайивалиин гизаф рази вуча. Артмиш шулайи баяр-шубариз багъри гъулаъ гьамцир бажаранлу шаир ади гъабхьиваликан аьгъюди ккунду. Гъийин йигъан гъубшу серенжем баяр-шубариз нумуналу дарс вуйиганси гьисаб апIуз шулу», – гъапну Салман Мусаевичди.
ДугъритIанра, мялим, тербиячи, шаир Абумуслим Аьгьмедовдин эсерариъ айи марццишнуна манишну дурар урхурайирин юкIвариз тясир апIуру, багъри юрдарихьна вуйи ккунишин артухъ апIуру. 33 йисан яшнаъ ади уьмриан гъушнушра, шаири чан кьяляхъди ужуб шил гъибтну. Му серенжемдиъ иштирак гъахьидарин му йигъ кьаназ кIваин гъубзур кIури, дурар шаирин поэзияйихьна хътакур кIури, умудлу хьуз шулу.
