Ватандин Аьхю дявдин Гъалибвалин гъаншариъ Урусатдиъ кьувватнаъ ипнайи «Гьюрматнан вахтайин» дахилнаъди, аьдат вуйиганси, ТОКС-дин вакилари 1941-1945-пи йисари чпикан хабар имдарди гъудургу эскрарин гьякьнаан мялуматар уч апIбан ва женгарин иштиракчйирин гьюрмат уьбхбан шилнаъди саб жерге серенжемар кIули гъахура.

 

 

 

Улупнайи акция Урусатдин саки вари регионариъ заан дережайиъди гъабхувал аьдатназ илтIибкIну хайлин йисар ву.

 

 

 

Апрелин 25-пи йигъан «Гьюрматнан вахта» Хив райондиъра ачмиш гъапIну.

 

 

 

Хив Гъалибвалин паркдиъ «Лизи кьарнийирин» ядигарихъ пашманвалинна гьюрмат уьбхбан митинг ачмиш апIури, Хив райондин глава Ярмет Ярметовди дявдин йисари ихь абйири улупу гьунарарикан, дурарин гьюрмат уьбхбан важиблуваликан гъапну.

 

 

 

 

«Ватандин Аьхю дяви, Гъалибвал — мурар ухьуз уьмурлуг тарихлу ядиграр ву. Думу женгариъ совет халкьди улупу гьунарар я вахтнахьан, я инсанарихьан ктIуршвуз хьибдар. Ухьу, гъийин наслар, дявдин гьарсар иштиракчийикан вуйи аку фикрар аьсрариан ухьуз гъубзу хазнаси уьбхюз буржлу вухьа.

 

 

 

 

Хъа гъи ухьу, думу женгарин ветеранарин гьюрмат уьбхбахъди сабси, Украинайиъ уьмрихъ мягьрум гъахьи ихь ватанагьлийирра кIваина хурахьа. Дурари улупу гьунарар ихь наслариз даимлугъ нумуна ву», — гъапну райондин главайи.