Гьюрматлу мусурман чвйир ва чйир!

Магьа гирами Рамазандин ваз лап багарихьди улубкьура. Рамазан — мусурмнарин календарин урчIвубпи ваз ву. Думу вазлиъ Первердигар Аллагьди инсаниятдиз Аьхю рягьим – Кьур’ан тувну. Исламдин календариинди Рамазандин вазлин варитIан мяналуб – ярхи вазлин вари йигъари гьириндиан тап лавландизкьан ушв дибисну гъузувал ву: уьл дипIну, шид дубхъну ккундар, мелзналан чIуру гафар пуз хай шулдар, чIуру гъиллигъар дирчуб лазим ву, инсан, дюъйир апIури, ужудар, рягьимлу ляхнар апIбахъ духьну ккунду. Думу вазлиъ мусурмнари Кьур’ан аьгъю апIуру, урхуру, чпин уьмур Кьур’андиъ айи къанунариз асас вуди хъапIуз мумкинвалар агуру. Рамазандин ваз дин хъапIрудариз рюгьнан мар-ццивал ва мюгькамвал аьгъю апIру вахт ву.

Аьзиз ватанагьлийир!
Учвуз улубкьурайи Рамазандин ваз мубарак ибшри. Первердигар Аллагьдихьинди илтIикIну гъапIу ичв дюъйир ерхьри ва кьабул апIри.Учву ккадапIу уьмрин рякъюз дилигну уьмриъ варитIан важиблуб фу вуш аьгъю апIуз, харжиб дипну, ужуб хьади гележегдиз гъягъюз мумкинвал тувричвуз, Рамазандин вазли ичв улихь бахтнахьна, хъуркьуваларихьна вуйи рякъ ачмиш апIри, ичв хулариан берекет, ккуни инсанарин шадлу сесер кам даришри, ичв рюгь ва ниятар гьарган марцциди гъузри.

«Табасарандин нурар» газатдин редакцияйин
коллектив