1-пи майдиъ Дагъустан Республикайиъ сабпи ражну вуди караванерарин фестиваль башламиш гъапIну. Фестивалиин «Пекдин рякъ – Дагъустан. Дербент 2022» кIуру ччвур иливна. (Гъаври даршулайидариз: пекдин рякъ – машгьур вуйи «Шёлковый путь».)

 

 

Фестиваль Дербент райондиъ ерлешмиш дубхьнайи, рягьятвал гъадабгъуз гъюрудариз дивнайи «Рубас» базайиин райондин администрацияйин кIулиъ айи Мавсум Рягьимовди ачмиш гъапIнийи. Серенжемдиъ гьацира райондин депутатарин Собраниейин председатель Мажмудин Самедовра иштирак гъахьнийи.
Караванер – чархариин али хулаъ яшамиш шули, жюрбежюр юрдариъ лицурайи инсан ву. Караванерарин машинариъ, аьдат вуйиганси, хулариъ шлу вари шартIар: пич, холодильник, ккурттар урччру машин, дахъру йишв, жикIру йишв ва гь.ж. ади шулу. Гьелбетда, дурарин варидарин «фургънар» сабсдар дар – сасдари гьязур вуйи машин-фургъун масу гъадабгъуру, хъа тмундари аьдати машинар чпин хилариинди хулариз илтIикIуру.

Дагъустандиъ кIули гъябгъюрайи фестивализ машинарикан дапIнайи хулариъди мина Владивостокдилан гъадабгъну, Севастополиина гъяйиз – Урусатдин жюрбежюр йишвариан ва гьацира Белоруссияйиан, Финляндияйиан ва Казахстандиан 200-тIан артухъ дестйир дуфна. Мициб саягъниинди дуфнайи туристар саб йишв’ин уч хьувалин метлеб – сар-сарихъди таниш хьувал, чпин тажрубайикан сар-сариз ктибтувал ва гьацира маракьлуди вахт адапIувал ву.
Хялариз мушваъ «Халкь-дин алатарин ансамбли» ва «Терекеме» ччвур али фольклорин дестейи концерт улупну.