Багарихьди Дагъустандиъ «Кюч апIувал» ччвурнаккди республикайин марччлихънарин рягьти дару ляхникан ктибтурайи документальный кино адабгъуз хъюгъбанди ву. Дидин тешкилатчйир РФ-дин медениятдин министерствойин кюмекниинди «Жвуван гаф» кIуру яратмиш апIбан тешкилат ву.

 

 

Апрелин аьхириъ «Дагъус-тан» РИА-йиъ кIули гъубшу пресс-конференцияйиъ му компанияйин вакилари кино адабгъувал фици ва наан тешкил апIбанди вуш, хъайи-хъайиганси ктибтну. Режиссер Аьбдулагь Бечедовди, журналистарин улихь удучIвну улхури, къайд гъапIганси, кинойин авторарин метлеб – чарвйирин лиж дюзенариан сивариз кюч апIуб улупувал, му рякъюъ марччлихънариз алахьури шлу читинваларикан ктибтувал ва му пишейихьна, медениятдин ирснахьнаси, инсанарин фикир жалб апIувал ву, фицики аьхиримжи йисари, иллагьки жигьиларин арайиъ, марччлихънин пишейихьна вуйи маракьлувал зат имдарди гъудубгну.
Видеосъемкйир «Согратль» агрофирмайин йишвариин гъахбанди ву. Чарвйирин лиж кюч апIури шлу рякъ, сивар-дагълар хътирчури, агьалйир яшамиш шулайи 30 гъулариантина Тлярата райондизкьан ерлешмиш дубхьна.

Документальный кинойин асас игит «Согратль» агрофирмайин 9-пи бригадайин марччлихъан Аьсгьяб Рамазанов ву. Кино адабгъбан ляхин гъюру йисан гьаму вахтназ ккудубкIбанди ву.

Режиссер Аьбдулагь Бечедовди, продюсер Анна Смир-новайи ва оператор Михаил Горабчукди чпин удучIвну улхбариъ къайд гъапIганси, кино адабгъбан асас метлеб – дагъустандин марччлихънарин зегьмет улупувал ва рес-публикайин медениятдин ирс уьбхбак аьдати марччлихъни киврайи пайнан кьимат за апIувал ву.