Гьар йисан хьадукра, ихь уьлкейин жара йишвариъси, Дагъустандиъра «Студентарин хьадукар» фестиваль гъабхувал аьдатнаъ абхъна. Дидин иштиракчйир жюрбежюр вузариъ урхурайи студентар ву. Фестивалин сабпи пай вуздин айитI гъабхуру, хъа студентарин гьязур дапIнайи ужударсдар нумрар гъядягъбан кьяляхъ, республикайин студентарин гала-концерт гъабхуру.

 

Гьаму йисан Дагъустандин варитIан адлу 5 вуздин студентарин арайиъ «Дагъустандин студентарин хьадукар-2022» гала-концертдиз ужударсдар 21 нумра адагънийи. Гьадрарин арайиъ «Милли вокал» номинацияйиъ «Табасаран» мяъли хьади ДГМУ-йин лечебный факультетдин 2-пи курснаъ урхурайи Самира Рамазанова удучIвнийи.

Ихь жигьиларин яратмиш апIбан устадвализ тамаши дапIну, дурариз кьимат тувуз РД-йин жигьиларин ляхнариз лигру министр Камил Сяидов, республикайин жигьиларин центрин директор Рашид Макьсудов ва Дагъустандин вузарин тербияйин ва яшайишдин ляхнариз лигру проректорар гъафнийи.

«Узу ич университетдиъ кIули гъубшу «Машгьурвалин дакьикьайиъра» «Табасаран» кIуру мяъли дапIну, сабпи йишв гъадабгънийза. Гьаддиз «Студентарин хьадукар» фес-тивализра гьадму мяъли хьади удучIвунза. Гала-концертдиъ мяълийир авар ва табасаран чIаларииндитIан гъапIундайи. Учу фестивалин лауреатар хьувализ лигну, РД-йин жигьиларин ляхнариз лигру министр Камил Сяидовди дипломар тувунчуз», – ктибтнийи ич сюгьбатнаъ Самира Рамазановайи.

«Узу Дагъустандин жигьилар варитIан ужудар вуйивалиин гьарган умудлу вуза. Гъи дурари нубатнан ражари чпик кайи бажаранвал улупну. Мяълийир, ялхъвнар, зарафатар гъапIдариз варидариз чухсагъул мялум апIураза, Самарайиъ кIули гъябгъру вари Урусатдин студентарин хьадукран фестивалиъ ихь жигьилар гъалиб шул кIури, умуд кивраза. Душваъра ичв тереф уьбхюз гъюбанди вуза», – къайд гъапну Камил Сяидовди.