Гъубшу йисан Дагъустан Республикайиз саб миллионна варжтIан артухъ туристар гъафну. Гъябгъюрайи йисан, туризмдин цирклин экспертарин фикриинди, республикайиз 2 миллион туристар гъиди.

 

 

Мисалназ, сиягьятдин маршрутар планламиш апIру OneTwoTrip сервисдин улупбарииди, гъябгъюрайи йисан туристар гъювалиан Урусатдин шагьрарин арайиъ Мягьячгъала 7-пи йишв’ин ал.

Улихьнаси республикайин Глава Сергей Меликовди РД-йин Халкьдин Собраниейиъ туризмдин цирклин артмиш’вализ асас фикир тувну ккунивал къайд гъапIнийи.

«Гъубшу йисан ухьу саб миллионтIан артухъ туристар кьабул гъапIунхьа. Гьаму йисандин прогнозари дурарин кьадар кьюб ражари артухъ шлувал улупура. Саб терефнаан, му ужуб ляхин ву, хъа тмуну терефнаан – миди ухьу хайлин ляхнар тамам апIуз мажбур апIура. Фицики, ухьу инфраструктура къайдайиз дубхну, хатIасузвал тямин дапIну, лазим вуйи кьадарнаъди транспортдин игьтияжар гьуркIну ккунду. Гьелелиг ухьуз, хялар кIван ачухъ’валиинди ва гьюрматлувалиинди кьабул апIувалтIан гъайри, фукIара адархьуз. Гостиницйир, санаторйир, рягьятвал гъадабгъру хулар артухъ гъахьнийиш, ужуди хьибдийи», – гъапнийи Сергей Меликовди.

Гьамусяаьт Дагъустандиъ туристариз варитIан кьабулди вуйи йишварин ва маршрутарин миржиб туристарин мялуматарин центрар ва санитарвалин зонйир тешкил апIурайи проект гьяракатнаъ ипра.

Улихьнаси Москва шагьриъ кIули гъубшу яркьу выставкайиъ Дагъустан Республикайи ккабалгнайи майдандиина варитIан гизаф инсанар гъафну. Дагъустандиъ рягьятвал гъадабгъбан мумкинваларихъди аьлакьалу меселйир гъи Урусатдин туристариз варитIан маракьлударикан садар духьна.